Kim Çen In “üstün döyüş qabiliyyətinə malik” zenit-raket kompleksini sınaqdan keçirdi
Pxenyan ABŞ-Cənubi Koreya alyansına qarşı yeni güc nümayişi etdi.
Şimali Koreya yeni hazırlanmış və kütləvi istehsalına başlanmış zenit-raket kompleksinin uğurla sınaqdan keçirildiyini açıqlayıb. Sınaq ölkə lideri Kim Çen Inın nəzarəti altında həyata keçirilib.
Crossmedia.az Şimali Koreyanın Raket İdarəsinin verdiyi açıqlamaya istinadən xəbər verir ki, sınağın yeni zenit-raket kompleksinin etibarlılığını sübut etdiyi bildirilib. Kim Çen In isə silah sisteminin “üstün döyüş qabiliyyətinə malik olduğunu” vurğulayıb. O, “Ordumuzun fəxr etməyə dəyər döyüş qabiliyyəti daha bir mühüm silah sistemi ilə gücləndirilir” deyə bəyan edib.
Bu hadisə ABŞ və Cənubi Koreyanın regionda keçirdiyi “Azadlıq Qalxanı” hərbi təlimlərinə Şimali Koreyanın sərt reaksiyasının dərhal ardından baş verib. Şimali Koreya Müdafiə Nazirliyi təlimlə bağlı verdiyi bəyanatda, “ABŞ və Cənubi Koreyanı nəzarət altına almaq üçün ən dağıdıcı və ölümcül silahların tətbiqi də daxil olmaqla, ordumuz bütün variantları nəzərdən keçirəcək” xəbərdarlığını edib.
Bəyanatda həmçinin qeyd olunub ki, ABŞ və Cənubi Koreyanın nüvə silahına sahib bir dövlətin təhlükəsizliyini təhdid etməsi ağır nəticələrə səbəb ola bilər. Pxenyan Vaşinqton və Seulu “məsuliyyətsiz və təhlükəli hərbi addımları” dayandırmağa çağırıb və əks halda “fəlakətli nəticələr” doğura biləcəyi barədə xəbərdarlıq edib.
Şimali Koreyanın bu silah sınağının ABŞ-Cənubi Koreya alyansının regiondakı hərbi fəaliyyətlərinə qarşı bir gözdağı olduğu şərhləri verilir.
Mədinə Cəlilova
14:12 21.03.2025
Oxunuş sayı: 895
