İranda 887 gün həbsdə qalan fransız vətəndaşı azad edildi
Fransa Prezidenti Emmanuel Makron, İran hakimiyyəti tərəfindən 887 gündür həbsdə saxlanılan Fransa vətəndaşı Olivier Grondeaunun azad edildiyini elan edib.
Crossmedia.az Fransa prezidentinin sosial media hesabında verdiyi açıqlamaya istinadən xəbər verir ki, 2022-ci ildən bəri İranda həbsdə olan 34 yaşlı Olivier Grondeaunun azadlığa buraxıldığını və artıq Fransaya döndüyünü bildirib. O, paylaşımında “Olivier Grondeau azaddır, Fransadadır, öz xalqının arasındadır! Ailəsinin sevincini paylaşırıq” sözlərinə yer verib. Prezident həmçinin hələ də İranda saxlanılan Cecile Kohler və Jacques Parisin də dərhal azad olunması üçün çağırış edib.
Fransa Xarici İşlər Naziri Jan-Noel Barro, Grondeaunun Fransaya dönüşü zamanı təyyarədə çəkilmiş fotosunu paylaşaraq, “Olivier Grondeau nəhayət azadlığa çıxdı. İranda 887 gün girov saxlandıqdan sonra ailəsinə, sevdiklərinə və vətəninə qovuşdu. Cecile Kohler və Jacques Paris də daxil olmaqla hələ də girov saxlanan bütün vətəndaşlarımızın azad olunması üçün yorulmadan çalışacağıq” ifadələrini işlədib.
Olivier Grondeau 2022-ci ilin oktyabrında turistik səfər zamanı İranın cənubundakı Şiraz şəhərində saxlanılmışdı. O, İranın Qərblə apardığı danışıqlarda siyasi təzyiq vasitəsi kimi istifadə etdiyi məhbusların saxlandığı Tehran şəhərindəki Evin həbsxanasına yerləşdirilmişdi. İran məhkəməsi onu casusluq və dövlətə qarşı sui-qəsd ittihamları ilə 5 il həbs cəzasına məhkum etmişdi.
İranda hələ də həbsdə olan Cecile Kohler və Jacques Paris isə Grondeaudan dörd ay əvvəl, 2022-ci ilin may ayında saxlanılmışdı. Onlar ölkədəki etirazları qızışdırmaqda ittiham olunmuşdu.
Mədinə Cəlilova
00:08 21.03.2025
Oxunuş sayı: 9207
