ABŞ-də 660 milyon dollarlıq məhkəmə qərarı: Greenpeace cərimələndi
ABŞ-nin Şimali Dakota ştatında bir münsiflər heyəti, ətraf mühit təşkilatı Greenpeace-in boru kəməri şirkəti Enerji Transferə 660 milyon dollar təzminat ödəməli olduğuna qərar verib.
Crossmedia.az xarici mətbuata istinadən xəbər verir ki, Dallas mərkəzli neft və qaz şirkəti Enerji Transfer Partners, Greenpeace-ə qarşı 2016 və 2017-ci illərdə Dakota Access boru kəmərinə qarşı keçirilən etiraz aksiyalarında “yanlış məlumat yayaraq insanları təxribat törətməyə təşviq etdiyi” iddiası ilə məhkəmə iddiası qaldırmışdı.
Greenpeace iddiaları rədd edərək, məhkəmə qərarının dinc etiraz hüququnu məhdudlaşdırmağa yönəldiyini bildirib. Şimali Dakota ştatının Mandan şəhərində doqquz nəfərlik münsiflər heyəti iki gün davam edən müzakirələrdən sonra əsasən Enerji Transferin xeyrinə qərar çıxarıb. Greenpeace-in hesablamalarına görə, şirkətə ən az 660 milyon dollar təzminat ödənilməlidir.
The Guardian qəzetinin məlumatına görə, Greenpeace məhkəmə başlamazdan əvvəl ABŞ-də ədalətli məhkəmə araşdırması aparılacağı ilə bağlı narahatlığını ifadə etmişdi. Təşkilat məhkəmə işini uduzacağı təqdirdə yüksək təzminat məbləğinin ABŞ-dəki fəaliyyətlərini iflasa uğrada biləcəyini bildirmişdi.
Enerji Transfer Greenpeace şəbəkəsinin müstəqil qurumlar deyil, vahid bir təşkilat olduğunu iddia edərək üç ayrı Greenpeace qurumuna qarşı iddia qaldırmışdı.
Greenpeace məhkəmə qərarını apellyasiya şikayəti ilə yenidən mübahisələndirəcəyini açıqlayıb.
Mədinə Cəlilova
23:55 20.03.2025
Oxunuş sayı: 1209
