Dövlət başçısının Qarabağa olan hər bir səfəri Böyük Qayıdış Proqramının uğurlu icrasıdır - Deputat açıqladı
Azad edilmiş ərazilərdə Azərbaycanın həyata keçirdiyi yenidənqurma işləri milli qürurun və tarixi ədalətin bərpasını simvolizə edir. 44 günlük Vətən Müharibəsindən sonra Qarabağ və Şərqi Zəngəzur ərazilərində genişmiqyaslı layihələr icra olunaraq, bu torpaqlarda həyat yenidən canlandırılır.
Şuşa şəhərində "Xarıbülbül" festivalının keçirilməsi və Qarabağın mədəniyyət paytaxtı elan edilməsi bu proseslərin mühüm addımlarından biridir.
Eyni zamanda, kənd təsərrüfatının inkişafı üçün suvarma sistemlərinin bərpası və yeni aqroparkların qurulması kimi təşəbbüslər də həyata keçirilib. Bu, regionun iqtisadi potensialını artırmaq və yeni iş yerləri yaratmaq məqsədinə xidmət edir. Təsərrüfatla yanaşı mədəni irsin bərpası da xüsusi diqqət mərkəzindədir. İşğal dövründə dağıdılmış məscidlər, muzeylər və digər abidələr diqqətlə bərpa edilir.
Azad edilmiş ərazilərin turizm potensialını artırmaq üçün təbiət parklarının yaradılması və beynəlxalq əhəmiyyətli turizm marşrutlarının formalaşdırılması istiqamətində də işlər sürətləndirilib. Bu addımlar Azərbaycanın gələcəyə olan baxışını, iqtisadi və mədəni inteqrasiyanı gücləndirmək əzmini əks etdirir. Yenidənqurma prosesi həm yaşayış şəraitinin yaxşılaşdırılmasına, həm də beynəlxalq ictimaiyyətdə Azərbaycanın nüfuzunun möhkəmlənməsinə təkan verir.
Crossmedia.az mövzu ilə bağlı Milli Məclisin deputatı Müşfiq Cəfərova müraciət edib.
Deputat ilk olaraq bildirib ki, ötən gün Azərbaycan Respublikasının Prezidenti İlham Əliyev və birinci xanım Mehriban Əliyeva Ağdərə rayonunun Həsənriz kəndində buraya köçən bir qrup sakinlə görüşüb, fərdi evlərin və infrastrukturun bərpası sahəsində görülən işlərlə tanış olublar:
“Dövlət başçısı İlham Əliyevin 44 günlük Vətən Müharibəsindən sonra demək olar ki, hər il Novruz bayramını məhz azad edilmiş ərazilərdə qeyd edir. Mən deyərdim ki, işğaldan azad olunmuş torpaqlarda Ali Baş Komandanın Novruz tonqalını alovlandırması hər bir azərbaycanlını qürurlandırır”.
Onun sözlərinə görə, Azərbaycanın dövlət siyasətində yol infrastrukturunun yaxşılaşdırılması prioritet istiqamətlərdəndir:
“Dövlətimizin başçısının tapşırıq və göstərişlərinə əsasən, yol təsərrüfatının bərpası, yenidən qurulması və müasir standartlara uyğunlaşdırılması istiqamətində işlər işğaldan azad olunmuş ərazilərdə də sürətlə davam etdirilir. Bu ərazilərdə icra olunan layihələr yenidən öz doğma torpaqlarına qayıdan əhalinin həyat şəraitinin yaxşılaşdırılması, iqtisadi əlaqələrin gücləndirilməsi və təhlükəsizliyin təmin edilməsi baxımından da önəm daşıyır”.
30 illik işğal dövründə tamamilə dağıdılan, yerlə-yeksan edilən şəhər və kəndlərimiz yenidən qurulur, bərpa edilir, soydaşlarımız mərhələ-mərhələ bu torpaqlara qayıdaraq onlara yeni nəfəs verirlər:
“30 il müddətində doğma yurd-yuvasından didərgin düşmüş soydaşlarımız bu günü səbirsizliklə gözləyirdilər və əmin idilər ki, bu gün gələcək.
Dövlətimizin başçısının Qarabağa olan hər bir səfəri Böyük Qayıdış Proqramının uğurlu icrasının hissəsi olan mühüm sosial obyektlərin açılışı və təməlqoyma mərasimlərinin keçirilməsi ilə yadda qalır. Sərsəng Su Anbarından Ağdərə rayonunun Umudlu kəndinə gedən avtomobil yolunun yenidən qurulması da belə mühüm layihələrdən biridir. Həyata keçirilən yenidənqurma işləri bu yolda rahat gediş-gəlişi təmin edəcək, yük və sərnişin daşınmasını asanlaşdıracaq, bölgənin turizm potensialının inkişafına da töhfə verəcək”,- deyən M.Cəfərov fikrini yekunlaşdırıb.
Nəzrin Salmanova
21:08 20.03.2025
Oxunuş sayı: 10921
