Google, 28 milyon dollar təzminat ödəyəcək
Google, ağ və asiyalı işçilərə digər etnik mənşəli işçilərlə müqayisədə daha yüksək maaş verdiyi və daha çox karyera imkanları tanıdığı iddiası ilə açılan məhkəmə işi çərçivəsində 28 milyon dollar ödəməyi qəbul edib.
Crossmedia.az xarici mediaya istinadən xəbər verir ki, keçmiş Google işçisi Ana Cantu tərəfindən 2021-ci ildə açılan iddiada, şirkətin ağ və asiyalı işçiləri üstün tutduğu, digər etnik mənşəli işçilərə daha az maaş verdiyi və karyera yüksəlişi üçün imkanlar tanımadığı iddia edilib.
Meksika mənşəli Cantu, Google-da 7 il ərzində böyük səy göstərərək işlədiyini, lakin ağ və asiyalı həmkarları vəzifədə irəliləyərkən özünün heç bir yüksəliş əldə edə bilmədiyini bildirib.
Google, 15 fevral 2018 - 31 dekabr 2024 tarixləri arasında işləyən 6 min 632 işçi adından açılan məhkəmə çərçivəsində 28 milyon dollar ödəməyi qəbul edib.
Kaliforniya Santa Klara Ali Məhkəməsinin hakimi Çarlz Adams, tərəflər arasında əldə edilən razılaşmaya ilkin təsdiq verib.
Google isə işçilərinə qarşı ayrı-seçkilik etdiyi iddialarını rədd edib.
Şirkət sözçüsü açıqlamasında, “Bir razılaşmaya gəldik, lakin hər hansı bir işçiyə fərqli münasibət göstərdiyimiz iddiaları ilə razılaşmırıq. Bütün işçilərimizə ədalətli maaş verməyə, işə qəbul və maaş siyasətimizi bərabər əsaslarla həyata keçirməyə sadiqik” ifadələrini işlədib.
Mədinə Cəlilova
21:38 20.03.2025
Oxunuş sayı: 8791
