“Avropa müdafiəsi NATO-nu əvəz edə bilməz” – İtaliya müdafiə naziri
İtaliyanın müdafiə naziri Quido Krozetto Avropa müdafiəsinin nə NATO-nu əvəz edə biləcəyini, nə də onun səviyyəsində təhlükəsizlik təmin edə biləcəyini bildirib.
Crossmedia.az xəbər verir ki, bu fikirlər onun "Corriere della Sera" qəzetində dərc olunan açıq məktubunda yer alıb.
Nazir qeyd edib ki, Avropa İttifaqı (Aİ) haqqında müqaviləyə (əvvəlcə Maastrixt, daha sonra Lissabon versiyası) əsasən, milli təhlükəsizlik üzv dövlətlərin səlahiyyətində qalır.
"Bu o deməkdir ki, hər bir ölkə öz müdafiəsinə cavabdehdir. Hazırda Aİ daxilində xarici təcavüz halında kollektiv müdafiəni təmin edən konkret hüquqi və avtomatik bir mexanizm mövcud deyil. Şimali Atlantika Müqaviləsinin 5-ci maddəsindən fərqli olaraq, Avropa müqaviləsi məcburi müdaxiləni nəzərdə tutmur", – deyə Krozetto vurğulayıb.
O əlavə edib ki, kollektiv müdafiə üçün yeganə praktiki model NATO-dur və Avropa müdafiəsi nə Alyansı əvəz edə, nə də onun səviyyəsində təhlükəsizlik təmin edə bilər.
Bununla belə, nazir müdafiə xərclərinin vacibliyini qeyd edib: "Təhlükəsizlik olmadan nə azadlıq, nə də sosial inkişaf mümkündür".
Sonda isə o, belə nəticəyə gəlib: "Müdafiə – bizim demokratiyamızın əsas dayağı və beynəlxalq nüfuzumuzun zəmanətidir".
Fatimə Məmmədova
18:00 20.03.2025
Oxunuş sayı: 787
