Dünyanın müxtəlif yerlərindən olan liderlər Azərbaycana gəlməkdə niyə maraqlıdır?- Deputat açıqladı
"Azərbaycan Respublikasının Prezidenti cənab İlham Əliyevin beynəlxalq arenada artan nüfuzunun təsdiqi və düşünülmüş hərbi və siyasi-diplomatik strategiyasının aktuallığı və onun öyrənilməsi istəyini Bakıda keçirilən 12-ci qlobal forum bir daha sübut elətdirdi".
Bu fikirləri "Crossmedia.az"a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Rizvan Nəbiyev bildirib.
Müsahib dünyanın müxtəlif yerlərindən çoxsaylı dövlət və hökumət xadimlərinin, diplomatlarının Bakıya təşrif buyurmasında iki əsas səbəbini vurğulayıb: "Birincisi, region və regionun sərhədlərini də aşan vacib geosiyasi dəyişikliklərin müəllifi- Azərbaycan respublikasının prezidenti cənab İlham Əliyevlə siyasi və şəxsi əlaqələr qurmaq istəyi, eyni zamanda bu hadisələrin mərkəzi olan Bakıda olmaq və o inkişafı yerində görməkdir. Bununla regionda yeni siyasi və geosiyasi reallıq yarandı. Bu reallıq beynəlxalq hüquqa əsaslanır və gələcəkdə əməkdaşlığın, inkişafın və inteqrasiyanın həyata keçirilməsi üçün fundamental baza təşkil edir.
O qeyd edib ki, Azərbaycan Prezidentinin torpaqlarımızın işğaldan azad edilməsi və işğalın nəticələrinin aradan qaldırılması ilə bağlı siyasətində bir neçə əsas mərhələ və istiqamət vurğulanmalıdır:
"İşğal dövründə uzaqgörən dövlət xadimi kimi onun hərbi sənayenin inkişafı, ordu quruculuğu və dövlətin iqtisadi gücünün artırılması sahəsində apardığı strategiya, eləcə də xalq və hakimiyyət birliyi nəticəsində 44 günlük Vətən müharibəsi və sonrakı bir günlük antiterror əməliyyatları uğurla başa çatdı. Bununla da dövlət müstəqilliyimiz, suverenliyimiz və ərazi bütövlüyümüz tam şəkildə bərpa olundu”.
O bildirib ki, Ali Baş Komandan İlham Əliyevin liderliyi altında Azərbaycanın qazandığı uğurlar, xüsusilə də Qarabağ münaqişəsinin həlli prosesində onun rolu, güclü dövlət və güclü lider anlayışının təsdiqi kimi dəyərləndirilə bilər:
"İlham Əliyevin bütün proseslərə şəxsən nəzarət etməsi, məsələləri incə detallarına qədər bilməsi və düzgün qərarlar qəbul etməsi dövlət idarəetməsində effektivliyi və strateji baxışı ön plana çıxarır. O, müasir beynəlxalq münasibətlərin mürəkkəbliyini nəzərə alaraq, milli maraqları müdafiə edən və ölkənin təhlükəsizliyini təmin edən siyasət yürüdüb. Azərbaycanın 44 günlük Vətən müharibəsində qazandığı qələbədə də özünü göstərdi. Prezident İlham Əliyevin qətiyyətli mövqeyi, diplomatik bacarığı və hərbi strategiyası Azərbaycanın ərazi bütövlüyünün bərpa edilməsində əsas amillərdən biri oldu. O, beynəlxalq arenada informasiya müharibəsini də uğurla apararaq Azərbaycanın haqq işini dünyaya çatdırdı. Eyni zamanda, dövlətin iqtisadi, hərbi və sosial sahələrdə güclənməsi Prezidentin həyata keçirdiyi islahatlarla bilavasitə bağlıdır. Güclü liderin rəhbərliyi altında ölkənin siyasi stabilliyi, inkişaf strategiyası və beynəlxalq nüfuzu möhkəmlənib".
R. Nəbiyevin fikrincə, hərbi əməliyyatlar zamanı Azərbaycan Prezidentinin Ali Baş Komandan kimi rəhbərliyi, eyni zamanda, beynəlxalq ictimaiyyət qarşısında ölkəmizin haqlı mövqeyini müdafiə etməsi xüsusi diqqət çəkir:
"Onun dünya mediasına verdiyi müsahibələr, beynəlxalq hüquqa əsaslanan siyasi səyləri bu gün də öyrənilir. Hətta ABŞ-ın hərbi məktəblərindən birində Azərbaycanın Qarabağ müharibəsində tətbiq etdiyi strategiya, xüsusilə Şuşa və Hadrut əməliyyatları dərindən araşdırılır.
Ermənilərin uzun illər ərzində keçilməz sərhədlər və digər miflər yaratdığını xatırladan R. Nəbiyev 44 günlük Vətən müharibəsində bu miflərin tamamilə darmadağın edildiyini qeyd edib:
"Azərbaycan şanlı qələbə qazandı. Eyni zamanda, Prezidentin apardığı düşünülmüş siyasət, verdiyi müsahibələr, beynəlxalq təşkilatlarda çıxışları və strateji addımları Azərbaycanın informasiya sahəsində də üstünlük əldə etməsini təmin etdi. Hazırkı mərhələ isə yeni yaranmış şəraitdə regional inteqrasiyanı ön plana çıxarır. Bu istiqamətdə atılacaq addımlar xüsusi əhəmiyyət kəsb edir".
Aydan Quliyeva
14:20 20.03.2025
Oxunuş sayı: 10467
