Putin: "Ordumuz Kurskda düşmən qoşunlarının məğlubiyyətini başa çatdırmaq üzrədir"
Rusiya prezidenti Vladimir Putin Kursk vilayətində Rusiya ordusunun uğur qazandığını və Ukrayna qüvvələrinin məğlubiyyətinin yekunlaşmaq üzrə olduğunu açıqlayıb.
Crossmedia.az xarici KİV-ə istinadən xəbər verir ki, o, bu barədə Moskva şəhərində Rusiya Baş Prokurorlarının iclasında çıxışı zamanı danışıb.
Putin bildirib ki, "Biz bu yaxınlarda kifayət qədər cəsarətli və effektiv əməliyyatlar həyata keçirdik. Ordumuz Kurskda düşmən qoşunlarının məğlubiyyətini başa çatdırmaq üzrədir."
Rusiya prezidenti çıxışında Kursk bölgəsində döyüşən Ukrayna əsgərləri və əcnəbi muzdluların Rusiya qanunlarına əsasən terrorçu kimi təsnif edildiyini vurğulayıb.
"Törətdikləri cinayətlər üzə çıxarılmalı, qeydə alınmalı və hərtərəfli araşdırılmalıdır", – deyə Putin əlavə edib.
Kurskdakı döyüşlər davam edir
Xatırladaq ki, 6 avqust 2024-cü ildə Ukrayna ordusunun Rusiyanın Kursk bölgəsinə daxil olmasından sonra iki ölkənin hərbi qüvvələri arasında toqquşmalar başlayıb. Döyüşlər hazırda da yüksək intensivliklə davam edir.
Rusiya ordusunun son günlər bölgədə əhəmiyyətli irəliləyiş əldə etdiyi bildirilir. Kurskdakı hərbi əməliyyatların gedişi və münaqişənin gələcək inkişafı ilə bağlı rəsmi açıqlamaların verilməsi gözlənilir.
21:50 19.03.2025
Oxunuş sayı: 908
