Kreml: "Putin və Tramp strateji tərəfdaş kimi bir-birinə güvənir"
Kremlin sözçüsü Dmitri Peskov Rusiya prezidenti Vladimir Putin və ABŞ prezidenti Donald Tramp arasında mövcud münasibətlər barədə açıqlama verib.
Crossmedia.az-ın xarici mediaya istinadən verdiyi xəbərə görə, Peskov bildirib ki, Putin və Tramp arasında mövcud münasibətlər ABŞ-Rusiya əlaqələrinin normallaşmasına töhfə verə bilər. “Onlar bir-birini yaxşı başa düşür, qarşılıqlı güvən nümayiş etdirir və Rusiya-Amerika münasibətlərinin normallaşması üçün addım-addım işləməyi hədəfləyirlər”, – deyə Kremlin sözçüsü vurğulayıb.
Onun sözlərinə görə, iki ölkə liderləri arasında birbaşa telefon xətti və videobağlantı imkanları mövcuddur. Lakin Co Bayden administrasiyası dövründə bu kanallardan demək olar ki, istifadə olunmayıb. Peskov qeyd edib ki, iki ölkə arasındakı münasibətlərin normallaşması uzunmüddətli prosesdir və hər iki liderin siyasi iradəsi tələb olunur.
Kremlin sözçüsü həmçinin bildirib ki, ABŞ və Rusiya arasında növbəti diplomatik təmasların formatı və dəqiq tarixi yaxın günlərdə müəyyənləşdiriləcək.
Peskov, eyni zamanda, Ukraynanın Rusiya elektrik stansiyasına hücumunu “müqavilənin sabotajı” kimi qiymətləndirib.
Onun sözlərinə görə, hücum baş verdiyi zaman Putin artıq enerji obyektlərinə hücumları 30 gün müddətinə dayandırmaq barədə göstəriş vermişdi.
Qeyd edək ki, Rusiya prezidenti Vladimir Putin dünən telefon danışığı zamanı Donald Trampın Rusiya və Ukraynanın enerji infrastrukturlarına hücumları müvəqqəti dayandırması ilə bağlı təklifini qəbul edib.
20:31 19.03.2025
Oxunuş sayı: 1122
