Ermənistan həqiqətən sülh istəyir? - AÇIQLAMA
Son illərdə Cənubi Qafqazda baş verən hadisələr, xüsusilə Azərbaycan və Ermənistan arasındakı gərginlik, beynəlxalq diqqətin bu bölgəyə yönəlməsinə səbəb olub. Müharibələr, atəşkəs pozuntuları, diplomatik çəkişmələr… və nəhayət, bu gün Ermənistanın Baş naziri Nikol Paşinyan Azərbaycanla sülh müqaviləsi imzalaya biləcəyini açıqlayıb.
Bu bəyanat çoxlarının ağlında suallar doğurur: Bu, həqiqətən də sülhə aparan yolun başlanğıcıdırmı, yoxsa siyasi manipulyasiya məqsədi güdür? Əgər bu müqavilə imzalansa, bölgədəki qüvvələr balansını necə dəyişə bilər?
Bu sualların cavabı təkcə Bakı və İrəvan üçün deyil, bütün region üçün mühüm əhəmiyyət kəsb edir. Çünki sülh müqaviləsi Cənubi Qafqazda yeni siyasi reallıq yarada, regional əməkdaşlıq imkanlarını artıra və uzun illər davam edən düşmənçiliyə son qoya bilər. Lakin bu müqavilənin imzalanıb-imzalanmayacağı və onun real nəticələrinin nədən ibarət olacağı hələ də açıq sual olaraq qalır.
Mövzu ilə bağlı Milli Məclisin deputatı Aydın Mirzəzadə Crossmedia.az-a açıqlama verib:
"Ola bilsin ki, həqiqətən də sülh müqaviləsi mətni tam hazırdı və tərəflər də onu imzalamaq barədə prinsipial razılıq əldə ediblər. Amma əsas məsələ bir tərəfdə sülh müqaviləsi imzalamaq istəyən Ermənistanın digər tərəfdən Azərbaycan mövqelərini atəşə tutmasıdır. Sülh istəyən ilk növbədə reallıqda öz niyyətini göstərməlidir. Amma Azərbaycan yenə də Ermənistan tərəfdən hərbi təhdidlərə məruz qalacaqsa onda imzalanacaq sülh müqaviləsinin elə də əhəmiyyəti olmur. Bu baxımdan Ermənistan ilk növbədə özünün sülhə hazır olduğunu göstərməlidir".
Ayhan Ağarzayev
19:43 19.03.2025
Oxunuş sayı: 1139
