Ermənistanın davam edən hərbi təxribatları: Üç fərqli versiya
Son günlər Ermənistan silahlı qüvvələrinin təxribatları davam edir. Ermənistanın bölgədə sabitliyə və sülh prosesinə zidd addımları, eyni zamanda, onun səmimi niyyətinin olmadığını bir daha göstərir.
Davam edən provokasiyalar barədə Crossmedia.az-a danışan siyasi şərhçi Kənan Novruzov deyib ki, son zamanlar Ermənistanın hərbi təxribatları intensivləşib: "Bu, Azərbaycan və Ermənistan arasında danışıqlar mətninin tam hazır olmasından sonrakı dövrə təsadüf edir və bir neçə ehtimalı gündəmə gətirir. Bir ehtimal odur ki, Ermənistan əslində sülhə maraqlı deyil. O, sözdə sülhdən danışsa da, əməldə bunu təsdiqləmir və vaxtı uzatmaq üçün müxtəlif manevrlərə əl atır. Bu, onların hansısa revanş planları üzərində işlədiyini göstərir. Digər tərəfdən, Ermənistan daxilində müəyyən revanşist güclər mövcuddur ki, onlar hakimiyyətin sülh istiqamətindəki addımlarına mane olurlar. Radikal qüvvələr hakimiyyəti zəiflətmək və öz mövqelərini gücləndirmək üçün təxribatlar törədir, vəziyyəti daha da gərginləşdirirlər. Bundan başqa xarici güclərin – Fransa, ABŞ və digərlərinin proseslərə təsiri də istisna deyil. Bu aktorlar Ermənistanı dəstəkləyərək və ya silahlandıraraq regionda təxribat mühitinin formalaşmasına göz yumurlar".
K.Novruzov qeyd edib ki, əgər ikinci və üçüncü ehtimallar doğrudursa, bu Ermənistan hakimiyyətinin artıq idarəolunmaz vəziyyətə düşdüyünü göstərir: "Yəni ölkədə ciddi siyasi böhran var və qərarların icrası faktiki olaraq hakimiyyətin əlində deyil. Əgər birinci ehtimal özünü doğruldursa və Ermənistan, həqiqətən, sülh prosesindən sadəcə vaxt qazanmaq üçün istifadə edirsə, bu, onlar üçün ağır nəticələr doğuracaq".
"Təxribatlar qarşıdakı dövrlərdə də təkrarlana bilər. Ermənistanın silahlanması, sərhəddə hərbi texnika toplaması və digər addımları göstərir ki, yeni bir hərbi gərginliyə hazırlıq görülür. Əgər bu təxribatlar davam edərsə, Azərbaycanın cavabı gecikməyəcək",-deyə siyasi şərhçi vurğulayıb.
Xumar Emilqızı
10:50 19.03.2025
Oxunuş sayı: 14424
