Şimali Koreya müharibə anonsu verdi: "Nüvə arsenalını gücləndirməyə çalışır"
Son illərdə beynəlxalq siyasətdə gərginliklər artmaqda davam edir və bunun əsas mənbələrindən biri də Şimali Koreyanın nüvə ambisiyalarıdır. Pxenyanın hərbi strategiyası və regionda yaratdığı təhlükə, xüsusilə Cənubi Koreya, Yaponiya və ABŞ üçün ciddi narahatlıq doğurur. Son açıqlamalarında Şimali Koreya lideri növbəti müharibənin qaçılmaz olduğunu bəyan edərək, ölkəsinin nüvə arsenalını gücləndirməsinin vacibliyini vurğulayıb. Bu bəyanat qlobal təhlükəsizlik baxımından yeni çağırışlar yaradır və Koreya yarımadasında mövcud olan gərginliyi daha da artırır.
Məsələ ilə bağlı Crossmedia.az-a açıqlama verən politoloq Elxan Şahinoğlu bildirib ki, Şimali Koreya lideri öz ölkəsində və ətrafda baş verən hadisələri özünə uyğun şəkildə təqdim etməyə çalışır, nüvə arsenalını gücləndirməyə səy göstərir: “Şimaki Koreya qonşu dövlətləri hədələyir . Düşünür ki, bunun cavabı olacaq.
Buna görə də böyük müharibə ilə bağlı fikirlər irəli sürülür. Əslində, Şimali Koreyanın hazırkı mövcudluğu və raket sınaqları keçirməsi qonşu Cənubi Koreyaya, Yaponiyaya, hətta Amerikaya qarşı təhdid yaradır. Çünki Amerikanın Cənubi Koreyada hərbi bazaları mövcuddur".
Analitikin sözlərinə görə, əgər Şimali Koreya Cənubi Koreyaya hücum edərsə, ABŞ da istər-istəməz müharibəyə qoşulmalı olacaq və bunun riskləri çox böyükdür: "Amma ABŞ Prezidenti Donald Tramp yeni müharibələrdə maraqlı deyil. O, birinci prezidentliyi dövründə də Şimali Koreya diktatoru ilə görüşüb müəyyən məsələləri həll etməyə çalışmışdı. Ola bilsin ki, gələcəkdə belə bir görüş yenidən baş tutsun.”
Nərgiz Camalzadə
17:43 29.01.2025
Oxunuş sayı: 2848
