Azərbaycan Mətbuat Şurasında azərbaycançılıq ideologiyasına həsr olunmuş dəyirmi masa keçirilib
Bu gün Azərbaycan Mətbuat Şurasında azərbaycançılıq ideologiyasının tarixi, əsasları və müasir dövrdəki əhəmiyyətinə həsr olunmuş dəyirmi masa keçirilib.
Crossmedia.az xəbər verir ki, tədbiri Mətbuat Şurasının sədri Vüqar Əliyev açıq elan edib. Dəyirmi masada akademik Nizami Cəfərov, millət vəkilləri Vüqar Rəhimzadə, Ceyhun Məmmədov, Aydın Mirzəzadə, Mətbuat Şurası İdarə Heyətinin üzvləri Azər Həsrət, Müşfiq Ələsgərli, Elçin Alıoğlu və digər iştirakçılar iştirak ediblər.
İlk söz akademik Nizami Cəfərova verilib. Nizami Cəfərov azərbaycançılıq ideologiyasının tarixindən, əsaslarından və “Kitabi-Dədə Qorqud”dan bəhs edib. O, çıxışında qeyd edib ki, bu gün azərbaycançılıq ideologiyasının ən böyük daşıyıcısı Prezident İlham Əliyevdir. Akademik eyni zamanda XX əsrdə azərbaycançılıq ideologiyasının yayılmasından, Cəlil Məmmədquluzadə və Əli bəy Hüseynzadənin bu ideologiyanı şərh etməsindən danışıb.
Daha sonra millət vəkili Aydın Mirzəzadə çıxış edib. O, azərbaycan dilindən, dilimizin tarixindən, dil və ideologiyanın vəhdətindən bəhs edib.
Növbəti çıxış edən millət vəkili Ceyhun Məmmədov olub. Ceyhun Məmmədov Azərbaycan xalqının etnik köklərinin tarixindən, islam mədəniyyətinin formalaşmasında Azərbaycan xalqının rolundan danışıb. O, Beyləqani, Bərdəi və Naxçıvaninin islam mədəniyyətinə təsirini qeyd edib. Millət vəkili həmçinin azərbaycançılıq ideologiyasının inkişafı üçün həm mediada, həm məktəblərdə, həm də universitetlərdə ciddi işlərin aparılmalı olduğunu vurğulayıb.
Sonra millət vəkili Vüqar Rəhimzadəyə söz verilib. Vüqar Rəhimzadə müasir dövrdə azərbaycançılıq ideologiyasının qarşısında duran tələblərdən, müasir dəyərlərdən və dövlətçilik ənənələrindən danışıb. O, azərbaycançılıq ideologiyasının hər bir vətəndaşın qarşısına məsuliyyət qoyduğunu qeyd edib.
Daha sonra Mətbuat Şurası İdarə Heyətinin üzvləri və digər iştirakçılar çıxış ediblər. Dəyirmi masanın müzakirəsini sonlandıran sədr Vüqar Zifəroğlu qeyd edib ki, Mətbuat Şurası media nümayəndələrinə təkliflər ünvanlayacaq. Hansı ki, bu təklif mətnində jurnalistlərin milli məsələləri daha obyektiv və həssas işıqlandırması yer alacaq.
Ayhan
17:00 12.11.2026
Oxunuş sayı: 52
