“Nvidia” ətrafında qalmaqal – Çin şirkətləri hərəkətə keçdi
Çinin süni intellekt şirkətləri ABŞ-nin texnologiya sahəsində yeni məhdudiyyətlər tətbiq edə biləcəyi ehtimalı fonunda xaricdə “Nvidia” prosessorları ilə işləyən hesablama resurslarını təmin etməyə çalışırlar.
Crossmedia.az xəbər verir ki, “Reuters” agentliyi bu barədə məlumat yayıb.
Bildirilib ki, “Nvidia” şirkətinin baş direktoru Censen Huanqın adı ətrafında yaranmış casusluq qalmaqalı Vaşinqtonun Çin şirkətlərinə qarşı texnoloji məhdudiyyətləri sərtləşdirə biləcəyi ilə bağlı narahatlıqları artırıb.
Hazırda ABŞ “Nvidia”nın ən qabaqcıl süni intellekt çiplərinin Çinə ixracını məhdudlaşdırır. Bununla belə, Çin şirkətləri xarici ölkələrdə yerləşən məlumat mərkəzlərindən hesablama gücü icarəyə götürməklə həmin prosessorlardan uzaqdan istifadə edə bilirlər.
Mənbələrə görə, Çinin iri bulud xidməti təminatçılarından biri xaricdəki “Nvidia” hesablama resurslarının əvvəlcədən rezerv edilməsi imkanlarını müzakirə edib. Bəzi kiçik süni intellekt laboratoriyaları isə Cənub-Şərqi Asiyadakı məlumat mərkəzləri ilə əlaqə saxlayıblar.
Şirkətlərin əsas narahatlığı ABŞ-də müzakirə olunan “Remote Access Security Act” (RASA) qanun layihəsi ilə bağlıdır. Sənəd qəbul edilərsə, ABŞ Ticarət Nazirliyi məhdudlaşdırılmış texnologiyalara xarici ölkələrdən bulud xidmətləri vasitəsilə çıxışı da tənzimləyə biləcək.
Qeyd olunur ki, qanun layihəsi ABŞ Konqresinin Nümayəndələr Palatasında qəbul edilib və hazırda Senatda baxılmasını gözləyir.
Məhdudiyyətlərin sərtləşdirilməsi ehtimalı Çin texnologiya şirkətlərinin səhmlərinə də mənfi təsir göstərib.
Honkonq birjasında “Alibaba”nın səhmləri 7,1 faizədək ucuzlaşıb. Süni intellekt modelləri hazırlayan “Z.AI” və “MiniMax” şirkətlərinin səhmlərində isə azı 7 faizlik geriləmə qeydə alınıb.
Bundan əlavə, ABŞ-nin qabaqcıl çiplərin Çinə qeyri-qanuni daşınmasına qarşı nəzarəti gücləndirə biləcəyi ehtimalı qeyri-rəsmi bazarda “Nvidia” prosessorlarına tələbatı artırıb.
Məlumata görə, bəzi treyderlər mümkün məhdudiyyətlərdən əvvəl həmin çipləri ehtiyatda toplamağa başlayıblar.
“Nvidia” rəhbərinin adı ətrafındakı casusluq iddiaları isə müstəqil şəkildə təsdiqlənməyib.
17:10 12.11.2026
Oxunuş sayı: 37
