Tramp seçki məğlubiyyətinə görə Senatı günahlandırıb
ABŞ Prezidenti Donald Tramp Respublikaçılar Partiyasının aralıq seçkilərində uğursuz nəticə göstərməsini seçki qanunvericiliyinə dair təşəbbüslərin Senatda qəbul edilməməsi ilə əlaqələndirib.
Crossmedia.az xəbər verir ki, Donald Tramp bu barədə “Truth Social” sosial şəbəkəsində paylaşım edib.
Tramp bildirib ki, Respublikaçıların nəzarətində olan Senat qanun layihələrinin qəbulunun qarşısını alan quruma çevrilməməlidir.
“Respublikaçıların Senatı artıq qanun layihələrinin ölmək üçün göndərildiyi yer ola bilməz”, – deyə ABŞ Prezidenti vurğulayıb.
O, seçicilərin şəxsiyyətini təsdiqləyən sənəd təqdim etməsini və ABŞ vətəndaşlığının sübut olunmasını nəzərdə tutan “SAVE America Act” qanun layihəsinin qəbul edilməməsini tənqid edib.
Trampın sözlərinə görə, Nümayəndələr Palatası tərəfindən beş dəfə Senata göndərilən sənədin qəbul olunmaması Respublikaçılar Partiyasının aralıq seçkilərdəki nəticələrinə ciddi mənfi təsir göstərib.
ABŞ Prezidenti Senatda qanun layihələrinin qəbulunu çətinləşdirən filibaster prosedurunun ləğvinə də çağırıb.
O iddia edib ki, demokratlar imkan əldə etdikləri təqdirdə bu proseduru mütləq aradan qaldıracaqlar.
“Filibasterin ləğv edilməməsi və arzuladığımız bütün qanunların qəbuluna nail olunmaması ABŞ-nin siyasi tarixində ən böyük səhvlərdən biri kimi yadda qalacaq. Çox təəssüf!”, – deyə Tramp bildirib.
17:19 12.11.2026
Oxunuş sayı: 36
