Qəza testində şok nəticə: Chery modellərinə sıfır ulduz!
Chery Tiggo 2 ailəsinə daxil olan krossoverlər Latin NCAP-ın qəza sınaqlarında sıfır ulduzla qiymətləndirilib.
Crossmedia.az xəbər verir ki, “Quto” nəşri bu barədə məlumat yayıb.
Latin NCAP-ın yenilənmiş metodika ilə keçirdiyi sınaqlarda Çin istehsalı olan Chery Tiggo 2, Tiggo 2 Pro, Tiggo 2 Pro Max və Tiggo Pro modelləri yoxlanılıb. Avtomobillər böyüklərin və uşaqların təhlükəsizliyinin qorunması üzrə ciddi çatışmazlıqlar nümayiş etdirib.
Mütəxəssislər ön zərbə zamanı kuzovun və sürücünün ayaq hissəsinin qeyri-sabit davrandığını, döş qəfəsinə yüksək təzyiq yarandığını müəyyən ediblər. Bundan başqa, toqquşmadan sonra avtomobilin alışması riski də qeyd olunub.
Sınaqlarda uşaqların müdafiəsi ilə bağlı da ciddi problemlər aşkarlanıb. Uşaq manekenlərində baş və boyun nahiyəsinə təhlükəli yüklənmələr qeydə alınıb, yan zərbə zamanı isə üç yaşlı uşağı təmsil edən manekenin oturacaqdan çıxması riski müəyyən edilib.
Təşkilat avtomobillərdə müasir sürücüyə yardım sistemlərinin də olmadığını bildirib. Kor zonaya nəzarət, zolaqda saxlama və avtomatik təcili əyləcləmə kimi funksiyalar modellərdə nəzərdə tutulmayıb.
Latin NCAP nümayəndələri nəticələri ciddi narahatlıq doğuran hal kimi qiymətləndirərək avtomobillərin təhlükəsizlik göstəricilərinin alıcılara əvvəlcədən açıqlanmasının vacibliyini vurğulayıblar.
Qeyd edək ki, sınaqlar Latın Amerikası və Karib hövzəsi bazarları üçün nəzərdə tutulan avtomobillər üzərində aparılıb. Buna görə nəticələri digər bazarlarda satılan bütün versiyalara avtomatik şamil etmək olmaz.
07:20 31.10.2026
Oxunuş sayı: 36
