İrlandiyanın yeraltı sirri: “Cəhənnəm qapısı”na yeni yol
İrlandiyada qədim mifologiya ilə bağlı “Cəhənnəm qapısı” kimi tanınan mağaraya və tarixi abidələrə aparan 13 kilometrlik yeni piyada marşrutu istifadəyə verilib.
Crossmedia.az xəbər verir ki, BBC bu barədə məlumat yayıb.
Yeni marşrut ölkənin Roskommon qraflığında yerləşən Ratrkroqan (Rathcroghan) arxeoloji kompleksinin əsas görməli yerlərini birləşdirir. Avropanın ən qədim və hələ də qazıntı aparılmamış kral məkanlarından biri hesab edilən ərazidə ümumilikdə 266 arxeoloji abidə qeydə alınıb. Onların arasında Dəmir dövrünə aid dairəvi istehkamlar, qədim irland yazıları həkk olunmuş daşlar və kurqanlar var.
Təxminən 5 500 illik tarixə malik Ratrkroqan qədim İrlandiyanın Konnakt əyalətinin paytaxtı olub. Ərazi mərasimlərin, mövsümi bayramların, kral tacqoyma mərasimlərinin və müxtəlif toplantıların keçirildiyi mühüm mərkəz sayılıb. İrlandiyanın milli eposu hesab edilən “Táin Bó Cúailnge” dastanının hadisələri də məhz burada başlayır və başa çatır.
Kompleksin ən sirli məkanlarından biri Oueynaqat (Oweynagat) mağarasıdır. Yerli mifologiyada bu mağara fövqəltəbii qüvvələrlə əlaqələndirilir və Halloween ənənələrinin yaranmasına təsir göstərən məkanlardan biri hesab olunur.
Rəvayətə görə, mağara qışın gəlişini bildirən Samhain bayramı ilə əlaqəli olan Mórrígan adlı mifoloji ilahənin məskəni olub. Qədim inanclara əsasən, oktyabrın 31-dən başlayan bu dövrdə canlılar dünyası ilə o biri dünya arasındakı sərhəd zəifləyir, ruhlar və fövqəltəbii varlıqlar mağaradan çıxırdı. İnsanların həmin varlıqlardan qorunmaq üçün fərqli geyimlərdən istifadə etməsi Halloween kostyumları ənənəsinin ilkin formalarından biri hesab olunur.
Yeraltında yerləşən və uzunluğu 37 metr olan mağara keçidi IX əsrdə kelt rahiblərinin yazılarında da xatırlanıb. Lakin yüksək karbon qazı səviyyəsinə görə təhlükəsizlik məqsədilə mağara hazırda ziyarətçilər üçün bağlıdır.
Yeni piyada marşrutunun tam qət edilməsi təxminən üç saat çəkir. Yol boyunca ziyarətçilər qədim kurqanları, dairəvi tikililəri və kral məzarlıqlarını görə bilərlər. Ərazidəki bəzi abidələr minilliklər ərzində kənd təsərrüfatı torpaqlarının bir hissəsi kimi qorunub saxlanılıb.
Arxeoloqların fikrincə, Ratrkroqan təkcə tarixi abidələr toplusu deyil, həm də qədim irlandların mərasimlərini, inanclarını və mifoloji dünyagörüşünü əks etdirən bütöv bir mədəni landşaftdır.
06:30 31.10.2026
Oxunuş sayı: 54
