İsraildə 7 oktyabrın sirri: Hücumun qarşısı niyə alınmadı?
İsrailin Qəzzə sərhədində yerləşən Kfar Aza kibbutzunun sakinləri 2023-cü il 7 oktyabr hücumlarından üç il sonra ölkənin təhlükəsizlik sistemindəki uğursuzluğun səbəblərinin araşdırılmasını tələb edirlər.
Crossmedia.az xəbər verir ki, “BBC” bu barədə məlumat yayıb.
7 oktyabr 2023-cü ildə HƏMAS-ın rəhbərlik etdiyi silahlı qruplar İsrailin cənubundakı yaşayış məntəqələrinə hücum edərək sərhəd xəttini keçiblər. Həmin gün Kfar Azada 64 nəfər öldürülüb, 19 nəfər isə girov götürülərək Qəzzaya aparılıb.
Hücum zamanı kibbutzun 14 nəfərlik mülki müdafiə dəstəsinin yarısı öldürülüb. Hadisə zamanı yaxınlarını itirən sakinlər üç il keçməsinə baxmayaraq, İsrail dövlətinin təhlükəsizlik sahəsindəki uğursuzluğa görə məsuliyyət daşımalı olduğunu bildirirlər.
Hücumda qardaşını və bacısı qızını itirən, daha dörd qohumu girov götürülən İnbar Qoldşteyn ölkəsinin baş verənlərə görə məsuliyyət daşımasını istədiyini deyib.
2023-cü il 7 oktyabr hücumu İsrailin 1948-ci ildə yaradılmasından bəri üzləşdiyi ən ağır hücum kimi qiymətləndirilir. Həmin gün İsrailin cənubunda təxminən 1 200 nəfər öldürülüb, 251 nəfər isə girov götürülərək Qəzzaya aparılıb.
Üç il keçməsinə baxmayaraq, hücumun baş verməsinə imkan verən səbəblərlə bağlı hələ də müstəqil dövlət istintaqı aparılmayıb. Həmin dövrdə ölkəyə rəhbərlik edən Baş nazir Benyamin Netanyahu isə yenidən seçkilərdə iştirak edir və İsrailin təhlükəsizliyini təmin etmək üçün daha sərt siyasət vəd edir.
İsrail daxilində əsas suallar ölkənin kəşfiyyat sistemindəki uğursuzluğun səbəbləri, hücumdan əvvəl hərbçilərə və siyasi rəhbərliyə hansı məlumatların çatdırılması və Netanyahunun nələrdən xəbərdar olması ilə bağlıdır.
Qəzza sərhədində xidmət edən qadın hərbçilərin də hücumdan aylar əvvəl mümkün hücuma hazırlıq barədə rəhbərliyə xəbərdarlıq etdiyi bildirilir. Onlardan biri olan Roni Eşel Kfar Azanın yaxınlığındakı Nahal Oz hərbi bazasına hücum zamanı digər 14 hərbçi ilə birlikdə öldürülüb.
Eşelin dayısı Elad Levi bildirib ki, hücumdan əvvəlki xəbərdarlıqların, o cümlədən Misir və BƏƏ tərəfindən İsrail rəhbərliyinə hər hansı məlumat ötürülüb-ötürülmədiyinin araşdırılması vacibdir.
Onun sözlərinə görə, yalnız 7 oktyabr hadisələrinin deyil, hücuma qədərki bir neçə il ərzində baş verən proseslərin də araşdırılması lazımdır.
22:30 07.10.2026
Oxunuş sayı: 58
