Almaniyalı siyasətçi xəbərdarlıq etdi: Rusiya ilə gərginlik müharibəyə səbəb ola bilər
Sara Vaqenknext Almaniya hökumətini Rusiya ilə münasibətləri yaxşılaşdırmağa və mümkün münaqişənin gərginləşməsinə yol verməməyə çağırıb.
Crossmedia.az xəbər verir ki, “Lenta.ru” bu barədə məlumat yayıb.
Almaniyalı siyasətçi bu barədə “X” sosial şəbəkəsində paylaşım edib. O bildirib ki, Almaniyaya Rusiya ilə dialoqun qurulması üçün səy göstərəcək hökumət lazımdır. Vaqenknextin sözlərinə görə, iki ölkə arasında gərginliyin artırılması sonda müharibəyə gətirib çıxara bilər.
Siyasətçi Almaniya kansleri Fridrix Mertsi də tənqid edib. O, kanslerin ölkə daxilində pensiya və səhiyyə xərclərini azaltmasını, eyni zamanda Ukraynaya milyardlarla avro dəyərində maliyyə yardımı ayırmasını narazılıqla qarşılayıb.
Oktyabrın 5-də Almaniya Federal Kəşfiyyat Xidmətinin rəhbəri Martin Yeger ölkəsinin Rusiya ilə silahlı münaqişəyə cəlb oluna biləcəyini bildirib. Bununla yanaşı, o, hazırda Berlinin Moskvanın belə bir qarşıdurmaya başlamaq niyyətində olduğuna dair hər hansı əlamət görmədiyini vurğulayıb.
Rusiya Prezidenti Vladimir Putinin mətbuat katibi Dmitri Peskov isə Almaniya rəhbərliyinin hərbiləşməyə çəkilən xərclərə haqq qazandırmaq üçün Rusiyanı süni şəkildə düşmən obrazında təqdim etdiyini iddia edib.
18:07 07.10.2026
Oxunuş sayı: 90
