Türkiyənin S-400-lərlə bağlı planına Rusiyadan şərt gəldi
Rusiya Türkiyə ilə əldə olunan bəzi razılaşmaların tam icra edilmədiyini bildirərək, S-400 zenit-raket komplekslərinin ölkə ərazisindən çıxarılmasının Moskvanın razılığı olmadan mümkün olmadığını açıqlayıb.
Crossmedia.az xəbər verir ki, “Lenta.ru” bu barədə məlumat yayıb.
Rusiyanın xarici işlər naziri Sergey Lavrov BMT Baş Assambleyasının 81-ci sessiyasında çıxışı zamanı Moskvanın türk tərəfdaşlarının səmimiyyətinə şübhə etmədiyini, lakin əvvəlki razılaşmalar üzrə bütün məsələlərin nəzərdə tutulduğu kimi həll olunmadığını deyib.
Onun sözlərinə görə, Rusiya və Türkiyə 2010-cu illərin ikinci yarısında Suriyanın Türkiyə ilə sərhədinin şimal hissəsi və İdlib bölgəsi ilə bağlı bir sıra razılaşmalar əldə edib. Lavrov həmin razılaşmaların hamısının tam şəkildə yerinə yetirilmədiyini qeyd edib.
Diplomat həmçinin Rusiyanın Türkiyədəki S-400 sistemlərinin dost ölkələrdən birinə köçürülməsinə razılıq verə biləcəyini bildirib. O, Avropa ölkələrinin Ukraynaya silah tədarükü üçün dünyanın müxtəlif yerlərində silah sistemləri əldə etdiyini deyib.
Lavrovun sözlərinə görə, Türkiyə tərəfi S-400 komplekslərinin Rusiyanın razılığı olmadan ölkə ərazisindən çıxarıla bilməyəcəyini bilir.
Qeyd edək ki, Türkiyənin müdafiə naziri Yaşar Gülər iyul ayında ölkənin S-400 sistemlərinin üçüncü ölkələrə yenidən ixracı ilə bağlı danışıqlar apardığını açıqlamışdı. “Bloomberg” isə 2025-ci ilin dekabrında Türkiyənin ABŞ-la münasibətləri yaxşılaşdırmaq və F-35 proqramına qayıtmaq məqsədilə S-400 sistemlərini Rusiyaya qaytarmaq variantını nəzərdən keçirdiyini yazmışdı.
23:13 26.09.2026
Oxunuş sayı: 39
