600 bal toplayıb qəbul ola bilməyənlər üçün yeni imkan
Bu il qəbul imtahanlarında yüksək nəticə göstərməsinə baxmayaraq 106 abituriyent ali məktəbə qəbul ola bilməyib. DİM-in “Abituriyent” jurnalının 7-ci sayında yer alan məlumata görə, onların 97-si IV, 9-u isə III ixtisas qrupu üzrə imtahan verib. 500-600 bal aralığında nəticə göstərərək müsabiqədən kənarda qalanların sayı isə 76 nəfərdir. Yüksək bal toplamağın avtomatik olaraq istənilən ixtisasa qəbul olunmaq anlamına gəlməməsi isə ixtisas seçiminin nə qədər mühüm olduğunu bir daha göstərir. Belə vəziyyətdə abituriyentlərin seçim imkanları, müsabiqədən kənarda qalma səbəbləri və boş qalan plan yerlərinə yenidən seçim imkanının olub-olmaması da diqqət çəkən məsələlərdəndir. 500-dən yuxarı bal toplayan 100-dən çox abituriyent kənarda qaldı – bu necə olur? Həmin şagirdlərə ikinci şans verilə bilərmi?
Mövzu ilə bağlı təhsil eksperti Əmrah Həsənli Crossmedia.az-a açıqlamasında bildirib ki, yüksək bal toplamaq avtomatik olaraq istənilən ixtisasa qəbul olmaq demək deyil: “Burada 500-dən yuxarı bal toplayan abituriyentin ali məktəbə qəbul olmaması ilk baxışdan təəccüblü görünə bilər. Amma burada bir məqamı nəzərə almaq lazımdır. Yüksək bal toplamaq avtomatik olaraq istənilən ixtisasa qəbul olmaq demək deyil. Abituriyent ixtisas seçimi zamanı konkret olaraq bir və ya bir neçə ixtisası hədəfləyirsə və həmin ixtisaslarda rəqabət yüksəkdirsə, bütün seçimini həmin istiqamətdə edə bilər. Bu halda müsabiqədən kənarda qalmaq mümkündür. Amma 600 bal toplamış abituriyentin kifayət qədər geniş seçim imkanları var və bu nəticə ilə bir çox ixtisaslara rahat şəkildə qəbul olmaq mümkündür. Sadəcə, bəzi abituriyentlər üçün məsələ hansı ixtisasa qəbul olmaq deyil, məhz arzuladığı ixtisasa qəbul olmaqdır. Ona görə də burada bütün məsuliyyəti Dövlət İmtahan Mərkəzinin üzərinə qoymaq düzgün deyil. İxtisas seçimi abituriyentin öz qərarıdır və hər kəs seçimini öz hədəfinə uyğun şəkildə formalaşdırır”.
Ə.Həsənli qeyd edib ki, ikinci şans məsələsinə bu gündən 2 sentyabr tarixinə qədər ali təhsil müəssisələrinin boş qalan plan yerlərinə ixtisas seçimi keçiriləcək: “Bəli, ola bilər ki, bəzi ixtisas qruplarında yerlər olduqca məhdud olsun, amma yenə də abituriyentlər öz seçimlərini bu istiqamətdə edə bilərlər”.
Zərnigar Hüseynli
15:30 28.08.2026
Oxunuş sayı: 47
