Tramp Zelenskini hakimiyyətdən uzaqlaşdırmaq istəyir? Ukraynanın gələcəyi Rusiyanın qərarından asılıdır!
ABŞ Prezidenti Donald Trampın Ukrayna Prezidenti Volodimir Zelenskinin vəzifəsini tərk etməli olduğu barədə son açıqlamaları Rusiya-Ukrayna müharibəsi fonunda Kiyevin siyasi gələcəyi ilə bağlı müzakirələri yenidən gündəmə gətirib. Tramp oktyabrın 10-da Ukraynanın yeni prezidentə ehtiyacı olduğunu bildirərək Zelenskini müharibənin dayandırılması istiqamətində kifayət qədər nəticə əldə etməməkdə tənqid edib. Zelenski isə Ukraynanın rəhbərini seçmək hüququnun yalnız ukraynalılara məxsus olduğunu vurğulayıb və Rusiyanın 60 günlük tam atəşkəsə razılaşacağı təqdirdə seçkilərin təşkilinə hazır olduğunu bildirib. Müharibənin davam etdiyi şəraitdə səsləndirilən bu bəyanatlar ABŞ-Ukrayna münasibətlərinin gələcəyi, sülh danışıqlarının perspektivləri və ölkədə seçkilərin keçirilməsi imkanları ilə bağlı sualları aktuallaşdırır.
Politoloq Abutalıb Səmədov Crossmedia.az-a açıqlamasında bildirib ki, Ukraynada prezident seçkilərinin keçirilməsi ehtimalı ilk növbədə Rusiya ilə atəşkəsin əldə olunmasından asılıdır:
“Ukraynada prezident seçkilərinin keçirilməsi ilə bağlı məsələ bir qədər gündəmə gəlmişdi və Zelenski iki ay ərzində seçki keçirmək təklifini qəbul etməmişdi. Ancaq indi qəbul edir. Əgər Rusiya iki ay ərzində atəşkəsə getsə, Ukraynada prezident seçkiləri keçiriləcək və çox güman ki, bu seçkilərdə yeni prezident seçiləcək”, - deyə politoloq qeyd edib.
Onun sözlərinə görə, rəy sorğuları Ukraynada bir sıra siyasi fiqurların nüfuzunun Zelenskidən yüksək olduğunu göstərir.
“Rəy sorğuları göstərir ki, həm indiki prezident ofisinin rəhbəri Budanov, həm də Böyük Britaniyada Ukraynanın səfiri Zelenskidən daha çox nüfuza malikdirlər. Trampın açıq şəkildə Zelenskinin istefasına çalışması təbii ki, Ukraynanın mövqelərini xeyli zəiflədib. Çünki Ukrayna ABŞ-nin köməyinə möhtac bir dövlətdir”, - deyə Abutalıb Səmədov bildirib.
Politoloq hesab edir ki, ABŞ-nin hərbi və kəşfiyyat dəstəyinin məhdudlaşdırılması Ukraynanın cəbhədəki vəziyyətinə ciddi təsir göstərə bilər.
“Ən əsası, kəşfiyyat məlumatları verilməzsə və Starlinkdən istifadəyə qadağa qoyulsa, bu, Ukraynanın cəbhədə vəziyyətini xeyli ağırlaşdıracaq və bunu Zelenski yaxşı bilir. Üstəlik, korrupsiya məsələləri ilə bağlı da ABŞ Zelenskiyə çox ciddi təzyiqlər göstərir. Bu mövqe həm Zelenskinin, həm də Ukraynanın danışıqlardakı mövqeyini xeyli zəiflədib”, - deyə o vurğulayıb.
A. Səmədovun fikrincə, Donald Trampın mövqeyi də Kiyevin danışıqlardakı imkanlarına təsir göstərir.
“Çox təəssüf ki, Tramp artıq açıq şəkildə Putinin mövqeyini müdafiə edir və Zelenskini sülhə nail olmağın qarşısında əsas maneə adlandırır. Halbuki işğalçı məlumdur və əsas təzyiqlər də Rusiya və onun prezidenti Putinə edilməlidir. Çox təəssüf ki, ABŞ fərqli mövqe tutur”, - deyə politoloq qeyd edib.
O bildirib ki, Rusiyanın iki aylıq atəşkəsə razılıq verməsi seçkilərin keçirilməsi üçün əsas şərt ola bilər, lakin Moskvanın belə bir qərara hazır olub-olmadığı hələ aydın deyil.
“Ukraynada prezident seçkiləri keçiriləcəkmi? Bu artıq Rusiyadan asılıdır. Rusiya atəşkəsə getməyə o qədər də meyilli görünmür. Ancaq onlar da bu qərarı qəbul etməyə məcbur qala bilərlər. Əgər Rusiya iki aylıq atəşkəsə getsə, Ukraynada prezident seçkiləri keçiriləcək və ABŞ-nin arzuladığı namizədin seçilməsi ehtimalı yarana bilər. Belə bir namizədin sülh sazişini imzalamağa razılıq verəcəyi gözlənilə bilər”, - deyə Abutalıb Səmədov bildirib.
Nigar Xəlilli
19:30 12.10.2026
Oxunuş sayı: 57
