Laçın Şəhəri Günü dövlətin ərazi bütövlüyünü ifadə edir
26 avqust – Laçın Şəhəri Günü tarixi Zəfərin, milli iradənin və doğma torpaqlara qayıdışın rəmzi kimi Azərbaycan xalqının yaddaşında xüsusi yer tutur. Bu tarixi gün Azərbaycan Respublikasının Prezidenti İlham Əliyevin 31 iyul 2023-cü il tarixli Sərəncamı ilə təsis edilib və hər il avqustun 26-sı ölkəmizdə Laçın Şəhəri Günü kimi qeyd olunur. Laçın Şəhəri Gününün təsis edilməsi Azərbaycanın işğaldan azad edilmiş ərazilərində tarixi hadisələrin əbədiləşdirilməsi istiqamətində həyata keçirilən dövlət siyasətinin mühüm tərkib hissəsidir. Bu gün yalnız hərbi-siyasi qələbənin qeyd olunması deyil, həm də Laçının keçmişdən bu günə və gələcəyə uzanan tarixinin, zəngin mədəni irsinin, təbii gözəlliklərinin və yenidən dirçələn həyatının nümayişidir.
Mövzu ilə bağlı Crossmedia.az-a açıqlama verın Milli Məclisin deputatı Pərvanə Vəliyeva bildirib ki, 1992-ci ildə Laçının işğalı Azərbaycan üçün ağır nəticələr doğurub, rayonun əhalisi doğma yurdlarından didərgin salınıb: "İşğal illərində Laçının yaşayış məntəqələri və infrastrukturu ciddi dağıntılara məruz qalıb, tarixi-mədəni irsə böyük ziyan vurulub. İşğal dövründə rayon ərazisində çoxsaylı mədəniyyət, təhsil, səhiyyə və digər obyektlər dağıdılıb, tarixi abidələr vandalizmə məruz qalıb".
Deputat qeyd edib ki, Laçın faciəsi uzun illər ərzində yüz minlərlə azərbaycanlının yaşadığı məcburi köçkünlük taleyinin bir hissəsinə çevrilib: Laçınlıların doğma şəhər və kəndlərinə qayıtmaq arzusu Azərbaycan xalqının Qarabağın və Şərqi Zəngəzurun işğaldan azad olunması ilə bağlı milli istəyinin ayrılmaz hissəsi olub. 2020-ci ildə 44 günlük Vətən müharibəsində Azərbaycanın qazandığı tarixi Qələbə Qarabağ münaqişəsinin hərbi-siyasi reallıqlarını köklü şəkildə dəyişib. Üçtərəfli bəyanata əsasən, 2020-ci il dekabrın 1-də Laçın rayonu Azərbaycana qaytarılıb. Lakin həmin mərhələdə Laçın şəhəri, Zabux və Sus kəndləri Azərbaycan nəzarətində olmayıb. 2022-ci il avqustun 26-da isə Azərbaycan Ordusu Laçın şəhərinə daxil olub, şəhər, həmçinin Zabux və Sus kəndləri Azərbaycanın nəzarətinə keçib. Beləliklə, Laçının tam azadlığı təmin edilib və uzun illər davam edən torpaq həsrətinə son qoyulub. Məhz bu tarixi hadisə 26 avqustun Laçın Şəhəri Günü kimi müəyyənləşdirilməsinin əsasını təşkil edir. Laçın Şəhəri Gününün əsas mahiyyəti Azərbaycan xalqının öz ərazi bütövlüyünü və suverenliyini bərpa etməsinin yaratdığı tarixi qürurun ifadəsidir. 2023-cü ildə ilk dəfə Laçında Şəhər Günü böyük təntənə ilə qeyd edilib. Prezident İlham Əliyev və birinci xanım Mehriban Əliyeva həmin tədbirlərdə iştirak ediblər, Həkəri çayının sahilində, şəhərin müxtəlif məkanlarında mədəniyyət və incəsənət proqramları, sərgilər, xalq sənətləri təqdimatları, Laçın mətbəxindən nümunələr və digər tədbirlər təşkil olunub. Bu tədbirlər Laçının yalnız fiziki baxımdan deyil, mənəvi və mədəni baxımdan da dirçəldiyini nümayiş etdirir. Xalq yaradıcılığının, milli sənət nümunələrinin, musiqinin, poeziyanın və yerli mətbəxin təqdim olunması Laçının zəngin mədəni kimliyinin qorunmasına və gələcək nəsillərə çatdırılmasına xidmət edir”.
P.Vəliyeva qeyd edib ki, Laçının azad olunmasından sonra qarşıda duran əsas vəzifələrdən biri şəhərin və rayonun yenidən qurulması, müasir infrastruktura malik yaşayış məkanına çevrilməsi və keçmiş məcburi köçkünlərin doğma yurdlarına qayıdışının təmin edilməsi olub. 2023-cü il mayın 27-dən etibarən keçmiş məcburi köçkünlərin Laçın şəhərinə qayıdışı başlanıb: "Bu hadisə Laçının tarixində yeni mərhələnin başlanğıcı kimi qiymətləndirilir. Bu gün Laçında yaşayış binaları, sosial obyektlər, təhsil və səhiyyə müəssisələri, mühəndis-kommunikasiya sistemləri və digər infrastruktur layihələri həyata keçirilir. Həmçinin, şəhərdə məktəblər, səhiyyə obyektləri, elektrik enerjisi infrastrukturu və müxtəlif inzibati və ictimai obyektlər istifadəyə verilib. Laçının dirçəldilməsi yalnız yaşayış məntəqələrinin inşası ilə məhdudlaşmır. Rayonun iqtisadi potensialının bərpası və yeni iş yerlərinin yaradılması da Böyük Qayıdış siyasətinin mühüm istiqamətlərindəndir. Laçında sənaye, kənd təsərrüfatı, enerji, turizm və digər sahələrin inkişafı üçün imkanlar genişdir. 2023-cü il avqustun 26-da Laçın Aqro-Sənaye Parkının açılışının keçirilməsi də bu baxımdan əhəmiyyətli hadisə olub. Bu gün parkda müəyyən müəssisələr fəaliyyət göstərir və istehsal imkanları genişləndirilir. Bununla yanaşı, rayonun zəngin su ehtiyatlarından istifadə etməklə kiçik su elektrik stansiyalarının yaradılması enerji potensialının artırılmasına xidmət edir. Belə layihələr Laçının iqtisadi dirçəlişini sürətləndirməklə yanaşı, regionun dayanıqlı inkişafına da töhfə verir. Bu gün 26 avqustun Laçın Şəhəri Günü kimi qeyd edilməsi ilk növbədə tarixi yaddaşın qorunmasına xidmət edir. Bu tarix həm Vətən müharibəsində əldə olunmuş Zəfərin nəticələrini, həm də uzun illər doğma torpaqlarından ayrı düşmüş insanların qayıdış sevincini özündə birləşdirir. Laçınlılar üçün bu gün doğma torpağa qayıdışın, ata-baba yurduna yenidən sahib çıxmağın və şəhərin həyatının bərpa olunmasının rəmzidir. Azərbaycan cəmiyyəti üçün isə Laçın Şəhəri Günü dövlətin ərazi bütövlüyünün bərpası, milli həmrəyliyin və dövlət-xalq birliyinin təntənəsini ifadə edən əlamətdar tarixdir”.
Zərnigar Hüseynli
13:00 25.08.2026
Oxunuş sayı: 61
