Meksikada FIFA-nın tarixi qəsrdə keçirdiyi ziyafətlə bağlı araşdırma başlanıb
Meksikanın Baş Prokurorluğu (FGR) FIFA-nın Çapultepek qəsrində təşkil etdiyi təntənəli şam yeməyi ilə bağlı araşdırmaya başlayıb.
Crossmedia.az xəbər verir ki, “El Universal” bu barədə məlumat yayıb.
Məlumata görə, araşdırma fonunda Meksikanın Milli Antropologiya və Tarix İnstitutu (INAH) tarixi obyektin icarə haqqına dair məlumatları məxfiləşdirib. Qurum bunu sənədin açıqlanmasının istintaq sirrini poza və araşdırmanın gedişinə təsir göstərə biləcəyi ilə əsaslandırıb.
Nəşrin məlumatına əsasən, FIFA Çapultepek qəsrindən istifadə üçün 1,3 milyon pesodan (təxminən 75 min ABŞ dolları) çox vəsait ödəyib.
Təntənəli şam yeməyi iyunun 10-da Meksika, ABŞ və Kanadanın ev sahibliyi etdiyi futbol üzrə dünya çempionatının açılışı münasibətilə təşkil olunub. Tədbirdə FIFA prezidenti Canni İnfantino iştirak edib. Meksika prezidenti Klaudiya Şeynbaum da qonaqları salamlayaraq qısa çıxış etmək üçün tədbirə qatılıb.
İyunun 23-də INAH-ın bir qrup əməkdaşı tarixi kompleksdə FIFA qəbulunun keçirilməsinin Meksika Konstitusiyasına zidd olduğunu bildirərək Baş Prokurorluğa müraciət edib.
Çapultepek qəsri Meksikanın ən mühüm tarixi və mədəni irs abidələrindən biri hesab olunur. Hazırda prokurorluq tədbirin keçirilməsi zamanı qanunvericiliyin pozulub-pozulmadığını araşdırır.
22:19 26.07.2026
Oxunuş sayı: 58
