İki uşağı olan şəxslər hərbi xidmətdən azad ola bilər? - AÇIQLAMA
Milli Məclisin Regional məsələlər komitəsinin sədri Siyavuş Novruzov parlamentin dekabrın 20-də keçirilən plenar iclasında "Hərbi vəzifə və hərbi xidmət haqqında" qanuna təklif edilən dəyişikliklərin ikinci oxunuşda müzakirəsi zamanı iki övladı olan şəxslərin hərbi xidmətə aparılmamasını təklif edib. O qeyd edib ki, hazırda üç uşağı olan şəxslər hərbi xidmətə çağırılmır. Bu məsələ iki uşağı olan şəxslər üçün də keçərli olmalıdır. Bəs yaxın vaxtlarda bu təklifin həyata keçirilməsi gözlənilirmi? Bu, baş verərsə, iki övladı olan şəxslərin hərbi xidmətə çağırılmaması dövlətin təhlükəsizlik və hərbi hazırlıq səviyyəsinə necə təsir göstərə bilər?
Məsələ ilə bağlı hərbi ekspert Emil Həsənli Crossmedia.az saytına açıqlamasında bildirib ki, bu məsələlərlə bağlı aidiyyatı qurum, Səfərbərlik və Hərbi Xidmətə Çağırış üzrə Dövlət Xidməti digər hərbi qurumlarla, Nazirliklərlə bir yerdə son dövr olan prosesləri də proqnozlaşdıraraq təkliflər hazırlayıb verir:
"Bu cür məsələlər hərtərəfli təhlil olunur. Bu gün Avropa ölkələri də çağırış sisteminə keçir. Biz bütünlüklə güzəştlər verə bilmərik, tək oğulu və ya iki övladı olan şəxslərə güzəşt etmək məsələləri gündəmə gətirilir, eyni zamanda bir çox digər təkliflər var, ali təhsilli, yəni magistratura, doktorantura təhsili almış şəxslər üçün də ard-arda bu cür təkliflər gəlir. Son dövrə baxanda vətəndaşların xeyrinə xeyli addımlar atılıb, amma burada dövlətin də maraqları nəzərə alınmalıdır. Bir müddət sonra təbii ki, iki uşaq məsələsinə, hətta gələcəkdə bir uşaq məsələsinə də baxıla bilər. Azərbaycan artıq peşəkar orduya keçib, ancaq çağırış sistemi olmadan peşəkar ordu da ola bilməz. Hansı ki, bir şəxs orta məktəbi bitirir, ondan sonra ya ali təhsilini davam etdirir, ya da peşə fəaliyyətində müxtəlif sahələrdə işləyir. Ona görə də çağırış sistemi olmalıdır ki, oradan gizirlər, müddətdən artıq hərbi qulluqçular müəyyənləşsin və bu şəxslərin içərisindən bir qismi öz arzuları ilə bu xidməti seçib fəaliyyətini davam etdirsinlər.
Gülşad İbrahimova
18:18 25.12.2024
Oxunuş sayı: 22765
