İlham Əliyevin Berlin səfəri: Almaniya Azərbaycanı əsas iqtisadi tərəfdaşlarından biri kimi qiymətləndirir
Azərbaycan Prezidenti İlham Əliyevin Almaniyaya rəsmi səfəri Bakı ilə Berlin arasında münasibətlərin strateji əhəmiyyətinin artdığını göstərən mühüm diplomatik hadisə kimi qiymətləndirilir. Danışıqların əsas mövzuları sırasında enerji təhlükəsizliyi, kritik xammal, Azərbaycan-Ermənistan sülh prosesi və beynəlxalq təhlükəsizlik məsələlərinin yer alması bu görüşün təkcə ikitərəfli deyil, həm də regional və Avropa miqyasında əhəmiyyət daşıdığını göstərir.
“Yeni Müsavat” media qrupunun rəhbəri Rauf Arifoğlu Crossmedia.az-a açıqlamasında Prezident İlham Əliyevin Almaniyaya rəsmi səfərini ikitərəfli münasibətlərdə yeni strateji mərhələnin başlanğıcı kimi dəyərləndirib.
Onun sözlərinə görə, dövlət başçısının Almaniya Prezidenti Frank-Valter Ştaynmayer və Federal Kansler Fridrix Mertslə keçirdiyi görüşlər Berlinin Azərbaycanla siyasi dialoqa yüksək önəm verdiyini göstərir: “Almaniya İqtisadiyyatının Şərq Komitəsinin sədri Mixael Harmsla keçirilən görüş isə siyasi dialoqun konkret iqtisadi layihələrlə tamamlanmasına verilən əhəmiyyəti nümayiş etdirir. Almaniya Azərbaycanı artıq yalnız enerji ixracatçısı kimi deyil, Cənubi Qafqazın əsas iqtisadi tərəfdaşlarından biri kimi qiymətləndirir. Bu gün Azərbaycan Berlin üçün Avropanın enerji təhlükəsizliyində etibarlı tərəfdaş, Orta Dəhlizin əsas halqalarından biri və geniş iqtisadi imkanlara malik regional gücdür. Bu yanaşma artıq təkcə rəsmi dairələrin deyil, Almaniyanın aparıcı biznes strukturlarının da mövqeyinə çevrilib".
O, qeyd edib ki, tərəflər arasında əməkdaşlıq artıq yalnız enerji sahəsi ilə məhdudlaşmır:
"Prezident İlham Əliyevin Mixael Harmsla görüşündə ənənəvi və alternativ enerji, logistika, Orta Dəhliz, kənd təsərrüfatı texnologiyaları və “ağıllı kənd təsərrüfatı” kimi istiqamətlərin müzakirə olunması göstərir ki, münasibətlər enerji satışından sənaye, texnologiya, investisiya və tranzit tərəfdaşlığına doğru inkişaf edir. Avropanın enerji təhlükəsizliyi strategiyasında Azərbaycanın rolu getdikcə artır. Azərbaycanın üstünlüyü yalnız enerji ehtiyatlarında deyil. Ölkəmiz siyasi baxımdan sabit, müqavilələrinə sadiq və müstəqil xarici siyasət yürüdən tərəfdaşdır. Avropa üçün enerji təhlükəsizliyi həm də etibarlı tərəfdaş və təhlükəsiz nəqliyyat marşrutları deməkdir. Azərbaycan bu meyarların hamısına cavab verir".
R.Arifoğlu səfər zamanı Azərbaycan-Ermənistan sülh prosesinin də əsas müzakirə mövzularından biri olduğunu vurğulayıb:
"Federal Kansler Aparatının rəsmi açıqlamasında da sülh prosesi əsas gündəlik məsələlərindən biri kimi göstərilib. Bu, Almaniyanın regionda formalaşmış yeni geosiyasi reallığı qəbul etdiyini göstərən mühüm siyasi siqnaldır. Almaniyanın bu prosesdə əsas rolu vasitəçilikdən daha çox, sülhün iqtisadi əsaslarının formalaşdırılmasına dəstək vermək ola bilər. Sülh sazişinin uzunömürlü olması regionda ticarətin, kommunikasiyaların, qarşılıqlı iqtisadi maraqların və investisiyaların inkişafından asılıdır. Almaniya sənaye, maliyyə və texnoloji imkanları ilə postmünaqişə dövründə Cənubi Qafqazın iqtisadi inteqrasiyasına ciddi töhfə verə bilər".
Siyasi şərhçi hesab edir ki, Prezident İlham Əliyevin Berlinə səfəri Azərbaycanın beynəlxalq mövqeyinin daha da möhkəmləndiyini nümayiş etdirir:
"Azərbaycan artıq hansısa güc mərkəzinin təsir dairəsinə daxil olmağa çalışan ölkə deyil. Ölkəmiz öz resursları, nəqliyyat imkanları və regional çəkisi ilə müstəqil aktora çevrilib. Berlin səfəri də göstərdi ki, Azərbaycan Avropanın enerji, nəqliyyat və təhlükəsizlik strategiyasının əsas tərəfdaşlarından biri kimi qəbul olunur".
Nigar Xəlilli
14:00 22.07.2026
Oxunuş sayı: 60
