Reytinq cədvəli açıqlandı: Azərbaycan ordusu regionda liderdir
2026-cı ilin ən güclü ordularının reytinq cədvəli açıqlanıb. Siyahıya 145 ölkə daxil edilib. 145 ölkənin hərbi potensialı şəxsi heyət, müdafiə büdcəsi, quru, hava və dəniz qüvvələri, texnoloji imkanlar və digər 60-dan çox meyar əsasında qiymətləndirilib. Siyahıda Azərbaycan 60-cı sırada yer alır. Gürcüstan 95, Ermənistan isə 101-ci yerdə qərarlaşıb. Qardaş ölkə Türkiyə 9-cu olub.Ermənistanın mövqeyinin geriləməsi diqqət çəkib. Mütəxəssislər bunu ölkənin hərbi potensialı və müharibədən sonrakı vəziyyəti ilə əlaqələndirirlər.
Hərbi ekspert Üzeyir Cəfərov bildirib ki, Ermənistanın reytinqdə geriləməsi gözlənilən idi: “Ermənistan müharibədən məğlub çıxmış dövlətdir və hazırda müxtəlif ölkələrdən silah-sursat, hərbi texnika alaraq bu boşluğu doldurmağa çalışır. Azərbaycanın hərbi potensialına çatmaq üçün Ermənistanın hələ uzun yol keçməsi lazımdır. Azərbaycan hazırda regionun ən güclü ordularından birinə malikdir.
Beynəlxalq hərbi reytinqlər tərtib olunarkən şəxsi heyətin sayı, silah və hərbi texnikanın imkanları, döyüş hazırlığı, hərbçilərin sosial və mənəvi-psixoloji vəziyyəti kimi çoxsaylı meyarlar nəzərə alınır”.
Ü.Cəfərov qeyd edib ki, bu göstəricilər üzrə Ermənistan ordusu geridə qalır: “Azərbaycan beynəlxalq hərbi əməkdaşlıqda, o cümlədən NATO-nun "Sülh naminə tərəfdaşlıq" proqramında daha fəal iştirak edir. Bu da ordunun hazırlıq səviyyəsinə müsbət təsir göstərən amillərdəndir. Buna görə də Ermənistanın reytinqdə Azərbaycan və Gürcüstandan geri qalması mövcud reallığı əks etdirir”.
Zeynəb Həsən
13:00 20.07.2026
Oxunuş sayı: 67
