Azərbaycanla Ermənistan arasında sülhə mane olan faktor nədir?
Ermənistanın təcavüzkar siyasəti regionda sabitliyi pozmuş və iki xalq arasında ciddi problemlərə səbəb olmuşdur. Lakin son dövrlərdə hərbi münaqişənin sona çatması və Azərbaycanın ərazi bütövlüyünü bərpa etməsi nəticəsində bölgədə yeni bir mərhələnin başlanğıcı müşahidə olunur. Qarabağdakı separatçı rejimin sıradan çıxarılması və münaqişəni alovlandıran faktorların aradan qaldırılması, iki dövlət arasında tarixi bir sülh müqaviləsinin imzalanması üçün real fürsət yaratmışdır. Bu, hər iki tərəf üçün yeni bir sülh və əməkdaşlıq dövrünə qapı aça bilər.
Mövzu ilə bağlı politoloq Elçin Xalidbəyli Crossmedia.az saytına açıqlama verib: "Ermənistan və Azərbaycan arasında hərbi münaqişə artıq sona çatıb, Azərbaycan isə öz ərazi bütövlüyünü bərpa edib. Qarabağdakı separatçı rejim sıradan çıxarılıb. İki ölkə arasında mübahisə və münaqişə yaradacaq amillər aradan qaldırılıb. Buna görə də yekun sülh müqaviləsinin imzalanması üçün həqiqətən tarixi fürsət yaranıb. Hər iki dövlət münaqişədən imtina etdiyinə görə sülh yolunda qətiyyətli addımlar atmaq imkanı əldə edib. Eyni zamanda, yekun sülh sazişinin 17 maddəsindən 15-i artıq razılaşdırılıb və delimitasiya məsələlərində də irəliləyişlər müşahidə olunur. Bu situasiyada yekun sülh sazişinin imzalanması üçün əlverişli şərait yaranır".
Politoloq sülhə mane olan faktorlardan da danışıb: "Problem yaradan əsas məsələlərdən biri Ermənistanın ABŞ və Avropa Birliyinin geosiyasi təsir dairəsinə çevrilməsidir. Ermənistan müstəqil qərarlar qəbul edə bilmir. Bu gün Ermənistan ABŞ, Avropa və Fransanın geosiyasi maraqlarına xidmət edən bir alətə çevrilib".
Sülh müqaviləsinin imzalanması üçün yaranan bu şərait bölgə xalqlarının sabit və təhlükəsiz gələcəyini təmin etmək baxımından əvəzolunmazdır. Lakin Ermənistanın müstəqil siyasət yürütməkdə çətinlik çəkməsi və xarici qüvvələrin təsiri altında qalması bu prosesin qarşısında əsas maneə olaraq qalır. Buna baxmayaraq, irəli sürülən razılaşmalar və delimitasiya prosesindəki irəliləyişlər, iki dövlətin gələcəkdə əməkdaşlıq əsasında inkişaf edə biləcəyinə dair ümidləri artırır.
Ayhan Ağarzayev
13:32 24.12.2024
Oxunuş sayı: 15615
