Üçüncü qüvvələrin iştirakı sülh prosesinə zərər verir
Avropa İttifaqının müşahidə missiyasının bölgədəki fəaliyyəti ilə bağlı müzakirələr davam edir. Ermənistan rəhbərliyi missiyanın müddətini uzatmaq üçün müxtəlif təşəbbüslər irəli sürsə də, Azərbaycan ekspertləri bunun sülh prosesinə zərər verə biləcəyini düşünür. Politoloqlar hesab edir ki, bölgədə üçüncü qüvvələrin iştirakı geosiyasi maraqlara xidmət edir və iki ölkə arasında müstəqil razılaşmalara mane olur.
Mövzu ilə bağlı Crossmedia.az-a açıqlama verən politoloq Əli Zülfüqaroğlu bildirib ki, “Azərbaycan ilə Ermənistan arasında əldə edilən razılaşmalar yalnız iki ölkə arasında keçirilən ikitərəfli görüşlər nəticəsində mümkün olub. Bu prosesin əsas mərhələsi Qazax istiqamətində sərhədlərin demarkasiyası ilə bağlıdır. Təklif Azərbaycan tərəfindən irəli sürülüb, çünki üçüncü qüvvələr ‘vasitəçi’ adı ilə prosesə müdaxilə etməyə çalışaraq sülh sazişinin imzalanmasına deyil, əksinə, sülh prosesini pozmağa cəhd edirdilər. Onlar bölgədə öz geosiyasi maraqlarını təmin etmək üçün maneələr yaradırdılar.”
Ekspertin sözlərinə görə, Azərbaycan bu müdaxilələrin qarşısını almaq üçün “üçüncü qüvvələrin prosesdən uzaqlaşdırılmasını təmin etməyə və ikitərəfli görüşlərin davam etdirilməsinə çalışıb.” Lakin Ermənistan sülh sazişindən yayınmaq üçün xarici dəstək əldə etməyə çalışır. Əli Zülfüqaroğlu əlavə edib ki, “Ermənistan, Qərb dövlətlərinin bölgədəki maraqlarından istifadə edərək, onlardan silah və maliyyə dəstəyi almağı, eyni zamanda sülh masasında üstünlük əldə etməyi planlaşdırır.”
Ekspert həmçinin vurğulayıb ki, Ermənistan Avropa İttifaqının müşahidə missiyası adı altında NATO ölkələrinin nümayəndələrinin bölgədə fəaliyyətini davam etdirməsini istəyir. Azərbaycanın razılığı əsasında həyata keçirilən məhdud müşahidə missiyası sonradan Ermənistan tərəfindən genişləndirilib. Əli Zülfüqaroğlunun fikrincə, “Fransa Avropa İttifaqı strukturlarında təsirini artıraraq bölgədə gərginliyi saxlamaq istəyir. Bu cür addımlar sülh prosesinə zərər verir, çünki bu, Azərbaycan və Ermənistan arasında pozitiv institusional münasibətlərin yaranmasına mane olur.”
Polşa prezidentinin bölgəyə səfəri zamanı Avropa İttifaqının müşahidə missiyasını dəstəklədiyini ifadə etməsi də Ermənistanın bu missiyanın davam etməsində maraqlı olduğunu göstərir. Ermənistanın əsas məqsədi bölgədə Qərbin maraqlarını təmin etməkdir.
Maral Şahverdili
14:27 24.12.2024
Oxunuş sayı: 10970
