KİV: Rusiyada benzin istehsalı tələbatın cəmi 65 faizini qarşılayır
Ukraynanın pilotsuz uçuş aparatları ilə həyata keçirdiyi zərbələrdən sonra Rusiyada benzin istehsalı mövsümi tələbatın yalnız təxminən 65 faizini ödəyir.
Crossmedia.az xəbər verir ki, "Reuters" bu barədə sənaye mənbələrinə və öz hesablamalarına istinadən məlumat yayıb.
Məlumata görə, Ukraynanın enerji infrastrukturuna, xüsusilə də iri neft emalı zavodlarına endirdiyi zərbələr nəticəsində Rusiyanın bir sıra əsas müəssisələri fəaliyyətini dayandırıb. Dayandırılan zavodlar arasında ölkənin ən böyük benzin istehsalçılarından olan NORSİ, Omsk və Saratov neft emalı zavodları da var.
Hazırda Rusiyada gündəlik benzin çatışmazlığının 40–45 min ton olduğu bildirilir. Yay mövsümündə gündəlik tələbatın 115–120 min ton səviyyəsində qiymətləndirildiyi qeyd olunur. İyun ayında isə bu göstərici təxminən 25 faiz idi.
Yanacaq qıtlığı bəzi bölgələrdə yanacaqdoldurma məntəqələrində uzun növbələrin yaranmasına səbəb olub. Vəziyyəti sabitləşdirmək üçün Rusiya hökuməti yanacaq ixracına məhdudiyyətlər tətbiq edir, ehtiyatlardan istifadəni artırır və Belarusla Hindistandan yanacaq idxalını genişləndirir.
09:54 11.07.2026
Oxunuş sayı: 50
