Hikmət Babaoğlu: Azərbaycan-Türkmənistan əməkdaşlığı Xəzər üzərindən Qərbə yeni imkanlar açır
Azərbaycan Prezidenti İlham Əliyev oktyabrın 8-də Türkmənistana işgüzar səfərə gedib. Səfər çərçivəsində dövlət başçısı Azərbaycan və Mərkəzi Asiya ölkələrinin liderlərinin 8-ci Məşvərət görüşündə, ilk Xəzər Ətraf Mühit Sammitində və MDB Dövlət Başçıları Şurasının iclasında iştirak edib. İlham Əliyev Türkmənistan Prezidenti Sərdar Berdiməhəmmədovla görüşündə ikitərəfli münasibətlərin inkişafını və əməkdaşlığın genişləndirilməsi imkanlarını müzakirə edib. Azərbaycan və Türkmənistan arasında siyasi dialoqla yanaşı, ticarət, nəqliyyat, tranzit, logistika və Xəzər dənizi ilə bağlı məsələlər də əməkdaşlığın əsas istiqamətlərindəndir. Səfər həm ikitərəfli əlaqələrin möhkəmləndirilməsi, həm də Azərbaycanın Mərkəzi Asiya ölkələri ilə regional əməkdaşlığının genişləndirilməsi baxımından əhəmiyyət daşıyır.
Crossmedia.az-a açıqlamasında Milli məclisin deputatı Hikmət Babaoğlu bildirib ki, iki ölkə arasında əməkdaşlığın hüquqi bazası əvvəlki illərdə imzalanmış sənədlərlə formalaşıb və hazırkı səfər bu əlaqələrin daha da dərinləşdirilməsi baxımından əhəmiyyət daşıyır:
“Azərbaycan və Türkmənistan arasında əməkdaşlığın dərinləşdirilməsi üçün hələ 2017-ci ildə strateji tərəfdaşlıq haqqında müqavilə imzalanıb. Bundan sonrakı mərhələdə hüquqi bazanın yaradılması istiqamətində yüzdən çox sənəd imzalanıb. Hazırda Azərbaycan Prezidentinin qardaş ölkəyə səfəri də məhz bu kontekstdə baş tutub”, - deyə deputat qeyd edib.
Onun sözlərinə görə, iki ölkə arasında əməkdaşlığın əsas istiqamətlərindən biri Xəzər dənizinin enerji və tranzit potensialından istifadədir. Türkmənistanın öz təbii ehtiyatlarını Qərb bazarlarına çıxarması baxımından Azərbaycan üzərindən keçən Trans-Xəzər marşrutu xüsusi əhəmiyyət daşıyır.
“Xəzər dənizinin karbohidrogen ehtiyatları, burada ortaq layihələrin həyata keçirilməsi və tranzit imkanları Azərbaycan-Türkmənistan münasibətlərinin səciyyəvi istiqamətlərindəndir. Türkmənistanın Xəzər dənizi vasitəsilə Trans-Xəzər marşrutu üzərindən Azərbaycan yolu ilə Qərbə çıxış əldə etməsi onun üçün yeni imkanlar yaradır. Uzun illərdir təbii ehtiyatlarını müxtəlif bazarlara çıxarmaqda çətinlik çəkən Türkmənistan üçün bu istiqamət xüsusi əhəmiyyətə malikdir”, - deyə Hikmət Babaoğlu vurğulayıb.
Deputat bildirib ki, əməkdaşlığın perspektivlərindən biri də “Dostluq” yatağının istismarı nəticəsində əldə ediləcək karbohidrogen ehtiyatlarının Azərbaycan üzərindən nəqli ilə bağlıdır. Onun sözlərinə görə, Azərbaycanın mövcud nəqliyyat infrastrukturu bu istiqamətdə imkanlar yaradır.
Hikmət Babaoğlu rəqəmsal bağlantı və yaşıl enerji sahələrində əməkdaşlığın da diqqətəlayiq olduğunu bildirib. “Türkmencell və Azercell arasında əldə olunmuş razılaşmaya əsasən, Xəzərin dibi ilə fiber-optik kabel çəkilməsi nəzərdə tutulur. Bu da iki ölkə arasında rəqəmsal əlaqələrin inkişafı baxımından mühüm istiqamətdir”, - deyə deputat qeyd edib.
O, Azərbaycan-Türkmənistan əməkdaşlığının üçüncü ölkələr üçün də yeni imkanlar yarada biləcəyini diqqətə çatdırıb. Deputatın sözlərinə görə, Özbəkistan, Türkmənistan və Azərbaycan prezidentlərinin Türkmənbaşıda keçirilən görüşündə Özbəkistanın Xəzər dənizi vasitəsilə Azərbaycana çıxışını asanlaşdıracaq liman infrastrukturunun yaradılması imkanları da müzakirə olunub.
“Bütün bunlar iki ölkə arasında əməkdaşlığın böyük potensiala malik olduğunu göstərir. Bu görüşdən sonra həmin imkanların reallaşdırılması üçün yeni əsaslar yaranacaq”, - deyə Hikmət Babaoğlu fikirlərini yekunlaşdırıb.
Nigar Xəlilli
20:45 09.10.2026
Oxunuş sayı: 55
