Xosrov Arutyunyan: Rusiyaya Ermənistanın Aİİ-dən çıxması sərf etmir
Ermənistanın sabiq baş naziri Xosrov Arutyunyan hesab edir ki, Ermənistan-Rusiya münasibətlərində mövcud gərginlik hələ bir müddət davam edəcək, lakin Rusiyanın Ermənistanın Avrasiya İqtisadi İttifaqını tərk etməsində marağı yoxdur.
Crossmedia.az xəbər verir ki, bu barədə o, "Sputnik Armenia"nın mətbuat konfransında bildirib.
Xosrov Arutyunyanın sözlərinə görə, Rusiya tərəfi Ermənistan rəhbərliyinin nəhayət Aİİ ilə Avropa İttifaqı arasında seçim etməsinə çalışacaq.
Sabiq baş nazir qeyd edib ki, hər iki ölkə yeni geosiyasi şərait nəzərə alınmaqla münasibətlərini yenidən qiymətləndirməlidir. Onun fikrincə, bu baş verməzsə, həm İrəvan, həm də Moskva mənfi nəticələrlə üzləşəcək.
Arutyunyan Ermənistanın coğrafi mövqeyinə də diqqət çəkərək bildirib ki, ölkə türk dövlətləri arasında müəyyən mənada "paz" rolunu oynayır və bu amil Rusiya üçün mühüm strateji əhəmiyyət daşıyır.
O əlavə edib ki, Ermənistanın bu rolu İran üçün Hörmüz boğazının əhəmiyyəti ilə müqayisə oluna bilər.
16:27 10.07.2026
Oxunuş sayı: 47
