İsveçrə Parlamentinin “Dağlıq Qarabağ” qətnaməsi: Cənubi Qafqazda sülh və sabitlik üçün təhlükə
İsveçrə Parlamentinin Aşağı Palatası “Dağlıq Qarabağ: Sülh Forumu” adlı absurd qətnaməni qəbul edib. Qətnamədə bölgədə beynəlxalq sülh forumunun təşkil edilməsi və Ermənistan sakinlərinin geri qaytarılması üçün şəraitin yaradılması təklif olunur. Lakin qətnamə Azərbaycanın ərazi bütövlüyü, beynəlxalq hüquq və münaqişənin real həlli istiqamətində görülən işləri nəzərə almadan qəbul edildiyi üçün haqlı narazılıqlara səbəb olub.
Qətnamə həm regionda sülh təşəbbüslərinə kölgə salmaq, həm də Azərbaycan ictimaiyyətində narazılıq yaratmaq riski daşıyır. Münaqişənin həlli ilə bağlı mövcud reallıqların təhrif edilməsi bu cür sənədlərin əsas problemli tərəfi kimi vurğulanır.
Məsələ ilə bağlı Milli Məclisin deputatı Ceyhun Məmmədov Crossmedia.az-a açıqlama verib. Deputat qətnaməni Azərbaycanın yaratdığı regional yeniliklərə qarşı atılmış addım kimi qiymətləndirib:
“Azərbaycan bölgədə yeni bir reallıq yaradıb. Bu yeniliklər bir çox dövlətlərin diqqətini cəlb edib və həmin dövlətlər Azərbaycana qarşı müxtəlif təxribatlara əl atmağa başlayıblar. İsveçrə Parlamentinin bu addımı da bu təxribatların tərkib hissəsidir. Təəssüf ki, biz artıq Azərbaycanın beynəlxalq səviyyədə hədəfə çevrildiyini müşahidə edirik”.
Ceyhun Məmmədov, Azərbaycanın beynəlxalq hüquqa əsaslanan mövqeyini və müstəqil siyasətini vurğulayaraq qeyd edib ki, belə qərarlar həm beynəlxalq hüququn prinsiplərinə, həm də regionda sülhün bərqərar olmasına ziddir:
“Qarabağ tarixi Azərbaycan torpağıdır və bu ərazilərdə ermənilərin törətdiyi cinayətlər hər kəsə məlumdur. Bu cür qətnamələr Azərbaycanın keçdiyi çətin yolu və beynəlxalq hüquq çərçivəsində əldə etdiyi nailiyyətləri nəzərə almır”.
Deputat, həmçinin Türkiyənin regiondakı rolunu və strateji əhəmiyyətini vurğulayaraq, ölkəmizlə Türkiyə arasındakı əməkdaşlığın regionda sabitlik üçün vacib olduğunu bildirib. O əlavə edib ki, belə addımlar bölgədə gərginliyi artırır və sülh prosesinə ciddi zərbə vurur:
“Beynəlxalq təşkilatlar və dövlətlər daha diqqətli olmalı, belə bəyanatlar vermədən əvvəl bölgədəki reallıqları və tarixi faktları nəzərə almalıdırlar. Əks təqdirdə, bu cür addımlar yalnız yeni problemlərə yol açır”.
İsveçrə Parlamentinin qəbul etdiyi qətnamə ilə bağlı haqlı narazılıqlar davam edir. Azərbaycanın bölgədə yaratdığı yeni reallıqlar və sülh təşəbbüslərinə qarşı bu kimi addımların beynəlxalq ictimaiyyət tərəfindən obyektiv qiymətləndirilməsi vacibdir.
Nihat Tahirov
09:57 21.12.2024
Oxunuş sayı: 11862
