Ermənistan Azərbaycanla bağlı yeni gözləntisini elan etdi
Ermənistan 2030-cu ilədək Azərbaycan və Türkiyə ilə sərhədlərin, eləcə də nəqliyyat kommunikasiyalarının açılacağına ümid edir.
Crossmedia.az xəbər verir ki, bu barədə Ermənistan xarici işlər nazirinin müavini Vaan Kostanyan bildirib.
Onun sözlərinə görə, Ermənistan gələcək tranzit daşımalarının artırılması məqsədilə yeni sərhəd-keçid məntəqələrinin tikintisi və avtomobil yollarının inkişafı da daxil olmaqla nəqliyyat infrastrukturunun modernləşdirilməsi məsələsində Avropa İttifaqı(Aİ) ilə əməkdaşlıq edir.
Kostanyan Azərbaycanın erməni yükləri üçün dəmir yolu əlaqəsini açmağa hazır olması ilə bağlı bəyanatlarına, həmçinin Türkiyənin Ermənistan mallarının öz ərazisindən tranzitinə imkan verə biləcəyinə dair son siqnallara diqqət çəkib.
Nazir müavini qeyd edib ki, Ermənistan Orta Dəhlizin öz ərazisindən keçən hissəsində yüklərin maneəsiz hərəkətini təmin etməyi planlaşdırır. Bunun üçün isə Aİ-nin dəstəyi ilə rəqəmsal həllərin və hüquqi bazanın daha da inkişaf etdirilməsi nəzərdə tutulur.
18:29 23.06.2026
Oxunuş sayı: 45
