ABŞ ilə müharibə özünü qalib sayan İranın Azərbaycan siyasəti necə dəyiçəcək?
ABŞ prezidenti Donald Trampın İranla mümkün razılaşma çərçivəsində 300 milyard dollarlıq investisiya fondunun yaradılması ilə bağlı yayılan xəbərləri təkzib etməsi beynəlxalq mətbuatda geniş müzakirələrə səbəb olub. Fevral ayına qədər Hörmüz boğazından keçidin pulsuz olduğu bir vaxtda, hazırda rüsumların tətbiqi və pərdəarxası iqtisadi-siyasi sövdələşmə iddiaları diqqətləri yenidən Vaşinqton-Tehran xəttinə yönəldib. Tərəflərin qarşılıqlı bəyanatlarına rəğmən, ortada səslənən böyük rəqəmlər regionun hərbi-geopolitik mənzərəsinin və qüvvələr balansının dəyişə biləcəyi ehtimalını gündəmə gətirir.
Mövzu ilə bağlı Crossmedia.az-a açıqlama verən AĞ Partiyasının sədri Tural Abbaslı bildirib ki, müharibə başlayandan bəri həm İran, həm də ABŞ tərəfi müxtəlif məzmunlu məlumatlar yayır və sonradan bunların bəziləri təkzib olunur:
“Hazırda nə İranın, nə də Amerikanın dediklərinə tam inanmaq olur. Çünki hər iki tərəf özünü qalib kimi göstərməyə çalışır. Bu səbəbdən etdikləri güzəştlərin dünya mediasına çıxmasında o qədər də maraqlı deyillər. İran adətən öz maraqlarına uyğun tərəfləri qabardır, Amerika da əksinə. Amma ortada kifayət qədər gündəmdə olan və müxtəlif mənbələrdən səslənən bir məbləğ var. Belə bir rəy yaranır ki, İran bu qarşıdurmadan dəyən zərərin kompensasiya olunması üçün ya Amerikanın özündən, ya da onun müttəfiqi olan Körfəz ölkələrindən bu məbləği tələb edib və ümumi bir razılıq əldə olunub”.
Partiya sədri Trampın şəxsiyyətinə və ABŞ-ın daxili siyasi vəziyyətinə də diqqət çəkib:
“Trampın şəxsiyyətini nəzərə alsaq, onun bir dediyi digərini tutmur, bəzən olmayan məsələləri deyir, bəzən isə təkzib edir. Mən onun bu təkzibini daha çox ABŞ-nin daxili auditoriyasına hesablanmış addım kimi qiymətləndirirəm. Çünki bilirsiniz ki, yaxın vaxtlarda ABŞ-də qanunverici orqanlara aralıq seçkiləri gözlənilir”.
T.Abbaslı bu proseslərin rəsmi Tehranın regiondakı davranışlarına və Azərbaycana mümkün təsirlərini belə şərh edib:
“İranın bu prosesdən dolayısı ilə qalib əhval-ruhiyyədə ayrılması onun regiondakı rəftarını dəyişəcək, siyasətini daha da radikallaşdırıb sərtləşdirəcək. Təbii ki, Azərbaycan da bu məsələdə ehtiyatlı olmalıdır. Çünki daha aqressiv və ruhlanmış bir İranla qonşuyuq. Hesab edirəm ki, bu amil nəzərə alınacaq. İranın Azərbaycana qarşı siyasətini daha da aqressivləşdirməsinin qarşısını alan əsas faktorlardan biri də Türkiyədir. O baxımdan, ehtiyatı əldən verməməklə yanaşı, müttəfiqlərimizə güvənməliyik”.
Ayxan İbişov
12:58 20.06.2026
Oxunuş sayı: 66
