Qazaxıstandakı Azərbaycan diasporu Müstəqillik Gününü qeyd edib
“Xəzər” Azərbaycanlıların Etnomədəni Assosiasiyası Astanada 28 May - Azərbaycanın Müstəqillik Gününü qeyd edib.
Crossmedia.az xəbər verir ki, tədbirdə fəal gənclərə sertifikatlar və hədiyyələr təqdim olunub.
Assosiasiyanın sədri Mahir Rzayev icma gənclərinin işi və fəaliyyətindən danışıb. O qeyd edib ki, müasir Azərbaycan müsəlman Şərqində qadınlara səsvermə hüququ verən ilk dövlət olan Azərbaycan Xalq Cümhuriyyətinin varisidir. Qısa müddət ərzində AXC parlament yaradıb və əhəmiyyətli ictimai işlər görüb. O, həmçinin bildirib ki, Azərbaycan həmişə özünü türk dünyasının bir hissəsi hesab edib. Natiq Azərbaycan Bayrağının rənglərinin rəmziliyi və mənasından da danışıb.
Assosiasiya sədri gənclərə müraciət edərək yaxşı təhsil almağın vacibliyini vurğulayıb. Qeyd edib ki, yüksəkixtisaslı azərbaycanlı gənclər Qazaxıstan və Azərbaycanın inkişafına töhfə verə biləcəklər.
Diaspor gəncləri Müstəqillik Günü ilə bağlı təqdimatla çıxış ediblər. Tədbirdə 28 May və cümhuriyyət tarixinə həsr olunmuş videoçarx da nümayiş etdirilib.
17:55 28.05.2026
Oxunuş sayı: 188
