BMT-yə çağırış: Ermənistanda Azərbaycanofobiyanın monitorinqi vacibdir
Azərbaycan tərəfi, Ermənistanda geniş yayılan Azərbaycanofobiya meyllərinin ciddi narahatlıq doğurduğunu bildirərək, BMT ekspertlərini bu problemi diqqətdə saxlamağa çağırıb.
Mövzu ilə bağlı politoloq Yalçın Hacızadə Crossmedia.az-a açıqlama verib. “Ermənilərin bizə qarşı olan düşmənçilikləri iki əsas bazaya söykənir. Biri ermənilər üçün digər qüvvələr və özləri tərəfindən uydurulmuş saxta tarix, saxta mədəniyyət, yəni ideologiya, digəri isə onların bizə qarşı olan torpaq iddiasını özündə əks etdirən qanunvericilik bazasıdır. Bu iki əsas faktor Azərbaycanofobiyanı və ya türkofobiyanı formalaşdırır.
Ermənilərin türkofobiyaya məruz qalmasını əsasən Rusiya imperiyası Cənubi Qafqazda istənilən zaman münaqişə yaratmaq və Türk dövlətlərinin birləşməsinin qarşısını almaq, daha sonra isə Qərb ölkələri tərəfindən Osmanlı imperiyasının parçalanması və Türkiyəyə qarşı siyasi təzyiq etmək məqsədi ilə təşkil edə biliblər. Ermənilər də bəzi qüvvələrin türk dünyasının inkişaf etməsinin qarşısını almaq üçün siyasətində maşa olaraq, onlar üçün yaradılmış, uydurulmuş bu saxta ideologiyanı mənimsəyərək, faydalanmağa çalışırlar. Türk dünyasının inkişaf etməsinin qarşısının alınması üçün ermənilərdən istifadə edilməsinə siyasi nəzəriyyədə “balanslaşdırma siyasəti” deyilir. Yəni inkişaf etməkdə olan ölkənin qarşısını almaq üçün rəqibləri tərəfindən süni şəkildə siyasi təzyiq mexanizmi yaratmaq”.
Yalçın Hacızadə bildirib ki, “Azərbaycanofobiya və ya türkofobiya xəstəliyinə tutulmuş ermənilər bizlərə qarşı 1800-ci ilin əvvəllərindən bəri ağır cinayətlər törədiblər. Son olaraq isə 30 ilə yaxın torpaqlarımızı işğalda saxlayıblar, minlərlə insanımızı qətl ediblər, milli-mədəni abidələrimizi məhv ediblər, yüz minlərlə soydaşımızı tarixi dədə-baba yurdu olan Qərbi Azərbaycandan qovublar. Hesab edirəm ki, irqi, dini, milli ayrı-seçkiliyə söykənən ermənilərin düçar olduqları Azərbaycanofobiya xəstəliyinin qarşısını almaq üçün beynəlxalq təşkilatlar əvvəllcə bizə qarşı ağır cinayətlər törətmiş Ermənistan dövlətinin və ayrı-ayrı ermənilərin cinayət məsuliyyətinə cəlb edilməsinə kömək etməlidirlər. Yəni bu sahədə ədalət təmin olunmalıdır və ermənilər bu saxta ideologiyanın cinayət tərkibi yaratdığını anlamalıdırlar. Eyni zamanda, azərbaycanlıların tarixi torpaqları olan Qərbi Azərbaycana qayıtmasına, həmin yerlərin tarixi adlarının qaytarılmasına, türk tarixi ilə bağlı olan abidələrin bərpa olunmasına, Azərbaycanofobiya təbliğ edən siyasi və bədii ədəbiyyat və dərsliklərin dəyişdirilməsinə nail olunmalıdır. Həmçinin, bizə və Türkiyəyə qarşı Ermənistanın rəsmi sənədlərində və atributlarında əks olunan torpaq iddiaları çıxarılmalıdır”.
“İkinci Qarabağ müharibəsindən sonra Ermənistan Baş naziri Paşinyan “tarixi (uydurulmuş) Ermənistan ya real Ermənistan” mövzusuna dəfələrlə toxunaraq bildirib ki, “uydurulmuş Ermənistan” bizim gələcəyimiz, regionda mövcud olmağımız üçün təhlükədir. Fikirimcə, Ermənistan türk dünyasının inkişafını görməli, qəbul etməli və onlardan bu inkişafın qarşısının alınması məqsədi ilə istifadə edilməsinin onlar üçün təhlükəsini də dərk etməlidirlər” – deyə politoloq qeyd edib.
Fidan Hacızadə
11:11 16.12.2024
Oxunuş sayı: 12540
