Floridada “Qadın bəstəkarlar: səslər, irs və interpretasiya” mövzusunda 5-ci konfrans keçirilib
ABŞ-nin Florida ştatının Melburn şəhərində Florida Ştatı Musiqi Müəllimləri Assosiasiyasının (“Florida State Music Teachers Assosiation – FSMTA”) “Qadın bəstəkarlar: səslər, irs və interpretasiya” mövzusunda 5-ci konfransı baş tutub.
Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.
Tədbir musiqi müəllimlərini, tələbələri və musiqisevərləri bir araya gətirərək peşəkar inkişaf və həmkarlar arasında fikir mübadiləsi üçün geniş imkanlar yaradıb. Həmçinin qadın bəstəkarların yaradıcılığı tarixi kontekst, ifaçılıq xüsusiyyətləri və pedaqoji yanaşmalar baxımından ətraflı təhlil olunub. Xüsusilə Azərbaycanlı qadın bəstəkarlar – Firəngiz Əlizadə, Əzizə Mustafazadə, Adilə Yusifova və digərlərinin əsərləri dinləyicilərin marağı ilə qarşılanıb. Boston Universitetinin doktorantura namizədi, peşəkar pianoçu və pedaqoq Leyla Zeynalovanın mühazirəsini və ustad dərsini iştirakçılar yüksək qiymətləndirib.
Brevard Musiqi Müəllimləri Assosiasiyasının (“The Brevard Music Teachers Association”) prezidenti, Florida Texnologiya Universitetinin professoru Pərvin Muradov konfransla bağlı fikirlərini bölüşüb. “Belə tədbirlər yalnız peşəkar inkişafı təşviq etmir, eyni zamanda mədəni əlaqələrin möhkəmlənməsinə, repertuarın zənginləşməsinə və musiqidə yeni səslərin tanıdılmasına mühüm töhfə verir”, – deyə o bildirib.
Konfrans tələbələrin çıxışı ilə yekunlaşıb.
21:47 19.03.2026
Oxunuş sayı: 11
