Helsinki Azərbaycan Evində təqdimat olub
Finlandiyanın paytaxtı Helsinkidə fəaliyyət göstərən Azərbaycan Evində ölkəmizin tarixi, mədəniyyəti və diaspor fəaliyyəti ilə bağlı geniş təqdimat olub.
Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.
Tədbir zamanı Azərbaycanın beynəlxalq müstəvidə tanıdılması istiqamətində görülən işlər, xaricdə fəaliyyət göstərən Azərbaycan Evlərinin rolu geniş müzakirə edilib.
Tədbirdə milli layihələr üzrə mütəxəssis Pia Halttunen və beynəlxalq layihələr üzrə mütəxəssis Jaana Savel, eləcə də Satakunta Tətbiqi Elmlər Universitetinin kommunikasiya üzrə mütəxəssisi Jatta Lehtonen və digərləri iştirak ediblər. Qonaqlara Azərbaycanın zəngin mədəni irsi, multikultural dəyərləri, çoxəsrlik dövlətçilik ənənələri və müasir inkişaf mərhələsi barədə müfəssəl məlumat verilib.
Tədbir zamanı dünyanın müxtəlif ölkələrindəki Azərbaycan Evlərinin fəaliyyəti xüsusi vurğulanıb. Bildirilib ki, bu mərkəzlər xaricdə yaşayan azərbaycanlıların birliyinin möhkəmləndirilməsi, milli kimliyin qorunması və Azərbaycanın beynəlxalq imicinin gücləndirilməsi baxımından mühüm rol oynayır.
Bundan əlavə, Azərbaycan Respublikasının Diasporla İş üzrə Dövlət Komitəsinin fəaliyyəti, diaspor təşkilatlarının dəstəklənməsi, xaricdə yaşayan azərbaycanlıların təşkilatlanması və şəbəkələşməsi istiqamətində həyata keçirilən layihələr haqqında da danışılıb.
Sonda gələcək əməkdaşlıq imkanları, birgə layihələrin həyata keçirilməsi və qarşılıqlı maraq doğuran sahələr üzrə tərəfdaşlığın genişləndirilməsi ilə bağlı fikir mübadiləsi aparılıb.
12:18 19.03.2026
Oxunuş sayı: 42
