Təklif dəstəkləndi: Buraxılış imtahanları eyni gündə keçirilsin
Təhsil eksperti Ramin Nurəliyev Crossmedia.az-a açıqlamasında təklif edib ki, buxarılış imtahanları zonalar üzrə yox, vahid qaydada, bir gündə keçirilsin. Onun səsləndirdiyi fikirlər geniş müzakirələrə səbəb olub.
Məlum olduğu kimi, son illərdə təhsil sistemində imtahanların keçirilmə qaydası və vaxtı cəmiyyət tərəfindən tez-tez müzakirə olunan mövzulardan birinə çevrilib. Xüsusilə buraxılış imtahanlarının müxtəlif günlərdə keçirilməsi bəzən sualların çətinlik dərəcəsi və qiymətləndirmənin ədalətliliyi ilə bağlı mübahisələr yaradır. Bu vəziyyət həm abituriyentlər, həm müəllimlər, həm də valideynlər arasında müxtəlif fikirlərin formalaşmasına səbəb olur. Bəzi hallarda bir imtahanın daha çətin, digərinin isə daha asan olduğu iddia edilir və bu da narazılıqlara gətirib çıxarır. Məhz buna görə imtahanların eyni gündə və vahid formada keçirilməsi məsələsi aktuallaşır. Belə bir yanaşma həm şəffaflığı artırar, həm də prosesə olan etimadı gücləndirə bilər. Eyni zamanda nəticələrin daha operativ elan olunmasına və ümumi prosesin daha səmərəli təşkilinə şərait yaradar. Bu baxımdan imtahanların eyni gündə keçirilməsi məsələsini ayrıca nəzərdən keçirmək vacibdir.
Məsələ ilə bağlı təhsil eksperti Elçin Əfəndiyev Crossmedia.az-a açıqlama verib.
O, buraxılış imtahanlarının eyni gündə keçirilməsinin vacibliyini vurğulayıb:
" Belə olduğu halda, abituriyentlər də, müəllimlər də, valideynlər də birinin digər imtahanını qınamaq və yaxud da ədalətsiz hesab etmək məsələsini aradan qaldırmış olarlar. Bu üsulla imtahanların eyni vaxtda yoxlanılması, cavabların eyni vaxtda çıxması da mümkün olacaq. O cümlədən də ümumi proses daha erkən həyata keçirilə bilər.
Çünki imtahanlar arasında müəyyən vaxtın olması, nəticələrin də müəyyən qədər gec elan edilməsinə və yaxud da prosesin daha uzun müddət çəkməsinə gətirib çıxarır.
Ona görə də vahid formada bütün istiqamətlər üzrə keçirilməsi, düşünürəm ki, məntiqli və məqsədəuyğundur.
Bunun üçün kifayət qədər insan resursu, maliyyə və o cümlədən texniki, maddi-texniki baza önəmlidir".
Mütəxəssis bütün lazımi resursların təmin ediləcəyi halda bu üsulun ən yararlı yol olacağını bildirib.
Turqut Ansari
15:15 16.03.2026
Oxunuş sayı: 56
