Meyn ştatında Azərbaycan musiqi mədəniyyətində qadınların rolundan bəhs olunub
ABŞ-nin Meyn ştatında yerləşən Cənubi Meyn Universitetində 8 Mart – Beynəlxalq Qadınlar Gününə həsr olunan “Gizli səslər: Azərbaycan musiqi mədəniyyətində qadınlar və kamança” (“The Hidden Sounds: Women and Kamancha in Azerbaijan’s Musical Culture”) adlı musiqili tədbir keçirilib. Meyn Azərbaycan Cəmiyyətinin təşkilatçılığı ilə baş tutan gecədə Azərbaycan icmasının üzvləri, universitetin tələbə-müəllim heyəti, eləcə də musiqisevərlər iştirak edib.
Crossmedia.az xəbər verir ki, tədbirdə Azərbaycan musiqi mədəniyyətində qadınların rolundan, onların bu sahəyə verdiyi töhfələrdən və xalq çalğı alətimiz kamançadan bəhs olunub.
Kamança ifaçısı Fidan Əliyeva geniş təqdimatla çıxış edərək bu musiqi aləti və onun keçdiyi inkişaf yolu haqqında danışıb. Dahi Üzeyir Hacıbəylinin Azərbaycan incəsənətinə gətirdiyi yeniliklər sayəsində xalq musiqisinin akademik səviyyəyə qalxdığı, müxtəlif musiqi alətləri, o cümlədən kamança ifaçılığı sənətinin geniş kütləyə yayıldığı vurğulanıb. Hazırda “Kamança simli musiqi alətinin hazırlanması və ifaçılıq sənəti”nin UNESCO-nun Qeyri-Maddi Mədəni İrs üzrə Reprezentativ Siyahısına daxil edildiyi xatırladılıb.
Daha sonra Fidan Əliyeva və pianoçu Rüstəm Zeynalov Azərbaycan musiqisinin zəngin irsini tamaşaçılara təqdim ediblər. Onların ifaları incə və emosional çalarlarla diqqət çəkib, dinləyicilərə xoş musiqi zövqü yaşadıb.
Sonda təşkilatçılar tədbirin keçirilməsinə göstərilən dəstəyə görə Portland Şəhər İqtisadi İmkanlar Ofisinə (Portland Office of Economic Opportunity) və Cənubi Meyn Universitetinin rəhbərliyinə təşəkkürlərini bildiriblər.
16:00 12.03.2026
Oxunuş sayı: 40
