Kino sektorumuzda inqilabi addımlar: Strateji təşəbbüslərə dəstək
Azərbaycan Respublikasının Kino Agentliyi ilin sonuna qədər yerli kino istehsalının aktivliyini göstərərək ən azı altı filmin premyerasını həyata keçirməyi planlaşdırır. Agentliyin baş direktoru Rəşad Əzizovun açıqlamasına görə, cari ilin ilk rübündə uşaqlar üçün nəzərdə tutulmuş tarixi-macəra filmi "Akinak" və daha sonra "Buzlar əriyəndə" filminin təqdimatı baş tutacaq.
Eyni zamanda ilin ərzində ən çox gözlənilən layihələrdən biri olan "44" bədii filminin premyerası və digər böyük layihələr – "Mənə bənzər adam", "Borc" və Türkdillli ölkələrin birgə istehsalı olan "Molla Nəsrəddin: Çətin günlərimin dostu" filmlərinin təqdimatı da reallaşacaq. Bu planlar yerli kino sektorunun inkişafı, yeni layihələrin izləyici ilə vaxtında görüşməsi və beynəlxalq əməkdaşlığın təşviqi baxımından mühüm əhəmiyyət daşıyır.
Məsələ ilə bağlı BDU-nun jurnalistika fakültəsinin müəllimi, tarix üzrə fəlsəfə doktoru Mahir Qəribov Crossmedia.az-la öz fikirlərini bölüşüb:
"Mən bununla bağlı qeyd etmək istərdim ki, “Molla Nəsrəddin: Çətin Günlərdə Dostluq” filmi Azərbaycan, Türkiyə və Özbəkistanın birgə əməkdaşlığı əsasında ərsəyə gəlmiş mühüm mədəni layihədir. Bu ekran əsəri, ilk növbədə, Türk Dövlətləri Təşkilatı çərçivəsində mədəni əlaqələrin inkişafına yönəlmiş olduqca dəyərli təşəbbüs kimi qiymətləndirilməlidir.
Xüsusilə vurğulamaq lazımdır ki, ortaq tariximizə, mədəni irsimizə və mənəvi dəyərlərimizə həsr olunmuş belə filmlərin hazırlanması dövlətimizin bu sahədə irəli sürdüyü strateji təşəbbüslərlə tam uzlaşır və ən düzgün addımlardan biri hesab oluna bilər. Dövlət başçısının “bizim ailəmiz Türk dünyasıdır” məzmunlu yanaşması da bu istiqamətdə həyata keçirilən mədəni layihələrin ideoloji əsasını təşkil edir.
Bu baxımdan, ortaq mədəniyyətimizi əks etdirən bədii və sənədli filmlərin çəkilməsi Türk dövlətləri arasında mənəvi birliyin daha da möhkəmlənməsinə, ortaq kimlik şüurunun güclənməsinə və mədəni inteqrasiyanın dərinləşməsinə mühüm töhfə verir.
Onu da qeyd etmək yerinə düşər ki, 7 aprel tarixində “Molla Nəsrəddin jurnalı”nın 120 illiyi tamam olur. Bu əlamətdar yubiley ərəfəsində sözügedən filmin hazırlanaraq tamaşaçılara təqdim olunması, şübhəsiz ki, milli mədəni irsimizin təbliği baxımından çox dəyərli bir töhfə kimi qiymətləndirilə bilər. İnanırıq ki, gələcəkdə Azərbaycan, Özbəkistan və Türkiyənin ortaq tarixi şəxsiyyətlərinə, ümumi milli-mənəvi dəyərlərinə həsr olunmuş yeni bədii və sənədli filmlərin hazırlanması davamlı xarakter alacaq və Türk dünyasının mədəni əməkdaşlığını daha da gücləndirəcək".
Elmir Heydərli
18:26 21.02.2026
Oxunuş sayı: 695
