"Spotify"dan 86 milyon mahnını oğurlayan hakerlər cəzalandırılıb
Spotify, platformasından 86 milyon mahnını qanunsuz şəkildə əldə edən proqramçı qrupunun hesablarını bloklayıb. Söhbət özünü mədəni irsin “qorunması” məqsədilə ən böyük açıq musiqi arxivini yaratdığını iddia edən Anna’s Archive təşkilatından gedir.
Crossmedia.az xarici mətbuata istinadən xəbər verir ki, məlumatların toplanması nəticəsində 256 milyon trekə aid metadata dərc edilib və 86 milyon musiqi əsərini əhatə edən, təxminən 300 terabayt həcmində fayl hazırlanıb. Bu materiallar Spotify-ın 2007-ci ildən 2025-ci ilin iyul ayınadək olan demək olar ki, bütün kataloqunu əhatə edir və platformadakı ümumi dinləmələrin 99,6 faizini təşkil edir.
Spotify nümayəndəsi zərərli fəaliyyətdə iştirak edən hesabların bloklandığını təsdiqləyərək bildirib ki, bu hadisə kiberhücum deyil, xidmətin istifadə şərtlərinin sistemli şəkildə pozulmasının nəticəsidir. Şirkət müəllif hüquqlarının qorunması üçün əlavə təhlükəsizlik tədbirləri gördüyünü və şübhəli aktivliyi izləməyə davam etdiyini açıqlayıb. Qeyd olunub ki, bu şəxslər bir neçə ay ərzində saxta istifadəçi profilləri vasitəsilə musiqiləri yükləyiblər.
Anna’s Archive isə öz bəyanatında adətən mətn materialları üzərində işlədiyini, lakin bu miqyasda musiqi irsinin qorunması üçün imkan gördüyünü bildirib. Təşkilat əldə edilən məlumatlar əsasında analitika da təqdim edib: ən çox dinlənilən treklər Billie Eilish, Lady Gaga və Bad Bunnyyə məxsus olub və onlar on milyonlarla daha az populyar mahnını geridə qoyub.
Bundan əvvəl məlum olub ki, 2025-ci ildə Rusiyaya qarşı həyata keçirilən bütün uğurlu, inkişaf etmiş haker hücumlarında giriş nöqtəsi fişinq olub.
Pərvin Hacıyeva
15:45 25.12.2025
Oxunuş sayı: 3211
