Rusiya nefti tükənir - Azərbaycan alternativ ola bilərmi?
Rusiyada neft emalı zavodlarına dron hücumları fonunda dizel yanacağının istehsalı və daxili bazara tədarükü ilə bağlı problemlər dərinləşir. Xarici medianın məlumatına görə, ölkənin dizel istehsalının təxminən yarısını təmin edən altı əsas emal müəssisəsində istehsal azalıb və ya dayanıb. Moskva daxili bazarı qorumaq üçün yanacaq ixracına məhdudiyyətlər tətbiq edib. Rusiyanın dünya yanacaq bazarındakı rolunu nəzərə alaraq, yaranan çatışmazlıq digər ölkələr üçün alternativ tədarük imkanlarını gündəmə gətirir. Bu vəziyyət Azərbaycanın neft emalı və yanacaq ixracı imkanlarından daha çox yararlanmasına şərait yarada bilərmi, yoxsa ölkənin mövcud istehsal gücü belə fürsətdən geniş istifadə etməyə imkan vermir?
İqtisadçı Emin Qəribli Crossmedia.az-a açıqlamasında Rusiyada dizel yanacağı ilə bağlı yaranan vəziyyətin əsasən ölkənin daxili bazarı ilə əlaqəli olduğunu bildirib. Onun sözlərinə görə, Ukraynanın Rusiya ərazisindəki neft emalı zavodlarına zərbələri yanacaq təchizatında problemlər yaradıb. Qəribli qeyd edib ki, Azərbaycanda isə neft və dizel qiymətləri dövlət tərəfindən tənzimləndiyindən Rusiyadakı vəziyyətin daxili bazara birbaşa təsir imkanları məhduddur.
“Bizdə neft emalı zavodunun imkanları daxili bazarı təmin etməyə hesablanıb və hazır neft məhsullarının, xüsusilə benzinin geniş həcmdə ixracı üçün imkanlar məhduddur. Hətta 95 markalı benzini müəyyən miqdarda idxal edirik. Ona görə də Rusiyada yaranan problemi əsas götürərək iqtisadiyyatı və gələcək ixrac siyasətini qurmaq düzgün olmaz”.
Emin Qəribli vurğulayıb ki, Rusiyanın neft emalı zavodları öz daxili tələbatını təmin etmək və ixrac imkanlarını qorumaq gücünə malikdir. Onun sözlərinə görə, Azərbaycan müəyyən dövrdə Rusiyaya bəzi neft məhsullarını yardım məqsədilə ixrac edə bilər, lakin bunun qısa müddətli xarakter daşıması mümkündür və Azərbaycanın bu istiqamətdə böyük həcmdə ixracla Rusiya və ya regional bazara ciddi təsir göstərməsi real görünmür.
“Bu vəziyyət nə dünya bazarlarına, nə də regional bazara ciddi təsir göstərə biləcək səviyyədə deyil. Rusiyada da söhbət əsasən daxili bazardan gedir və onların özləri də müəyyən imkanlara malikdirlər. Bizim ixrac imkanlarımız isə belə bir vəziyyətdə daha çox qısa müddətli və məhdud xarakter daşıya bilər”.
Nigar Xəlilli
20:40 15.09.2026
Oxunuş sayı: 44
