Farac Reform UK-yə verilən 72 milyon funt sterlinqlik ianəni müdafiə edib
Böyük Britaniyada Reform UK partiyasının lideri Naycel Farac partiyasına verilən ümumilikdə 72 milyon funt sterlinq məbləğində iki ianənin hazırkı qanunvericiliyə tam uyğun olduğunu bildirib.
Crossmedia.az xəbər verir ki, Farac “BBC”yə açıqlamasında iş adamları Ben Delo və Kristofer Harborn tərəfindən verilən hər biri 36 milyon funt sterlinq dəyərində ianələrin hazırda qanuni olduğunu deyib. Bu ianələr Britaniya siyasi tarixində indiyədək qeydə alınmış ən böyük siyasi ianələr hesab olunur.
Farac bildirib ki, Britaniya hökumətinin parlamentdə müzakirə etdiyi yeni qaydaların geriyə qüvvə ilə tətbiq edilərək bu ianələri qanunsuz elan etməsi qəbuledilməzdir. Hazırda müzakirə olunan qanun layihəsi xaricdə yaşayan britaniyalıların siyasi partiyalara illik ianələrinə 100 min funt sterlinq limit qoyulmasını nəzərdə tutur.
Reform UK lideri belə bir dəyişiklik qəbul ediləcəyi təqdirdə qarşılıq olaraq həmkarlar ittifaqlarının siyasi ianələrinin də məhdudlaşdırılmasını təklif edə biləcəklərini bildirib. Farac bunun siyasi maliyyələşmə sistemini ciddi şəkildə dəyişdirə və siyasi partiyaların dövlət hesabına maliyyələşdirilməsinə gətirib çıxara biləcəyini deyib.
Həmkarlar ittifaqlarının lideri Pol Novak isə Faracın mövqeyini tənqid edib. O, həmkarlar ittifaqı üzvü olan işçilərin illik kiçik ödənişlərini milyarderlərin maliyyələşdirdiyi siyasi partiyaya verilən böyük məbləğlərlə müqayisə etməyin düzgün olmadığını bildirib.
20:27 15.09.2026
Oxunuş sayı: 46
