Açıqlandı: Tramp Zelenskini də bu məsələdə razı salmağa çalışır
Rusiya-Ukrayna münaqişəsi beynəlxalq gündəmin ən aktual mövzularından biri olaraq qalmaqda davam edir. Müharibənin gedişi, tərəflər arasında diplomatik çıxış yollarının axtarışı və beynəlxalq reaksiyalar dünya siyasətinin əsas istiqamətlərindən birinə çevrilib. Bu məsələyə dair növbəti dəfə çıxış edən ABŞ Prezidenti Donald Tramp münaqişənin təkcə geosiyasi maraqlardan deyil, həm də iki ölkə lideri arasında yaranmış şəxsi ədavətdən qaynaqlanan çətinliklərlə mürəkkəbləşdiyini bildirib.
Avstraliyanın Baş naziri Entoni Albaneze ilə görüşündə Tramp sülhün əldə olunmasının mümkünlüyünə inandığını vurğulayıb. Onun sözlərinə görə, vəziyyət nə qədər gərgin olsa da, diplomatik razılıq əldə etmək hələ də realdır. ABŞ lideri həmçinin qeyd edib ki, müharibənin nəticəsi öncədən proqnozlaşdırıla bilməz, çünki “müharibə çox qəribə bir şeydir – bəzən yaxşı, bəzən isə pis nəticələr doğurur”.
Trampın bu bəyanatı ABŞ-ın sülhün bərpası istiqamətindəki səylərinin davam etdiyini göstərməklə yanaşı, Qərbin münaqişəyə yanaşmasında yeni tonun yaranmasından da xəbər verir. Onun sözləri, həm regionda sülhün bərpası perspektivlərinə dair nikbinlik, həm də müharibənin dərinləşməsi ehtimalına dair xəbərdarlıq kimi dəyərləndirilir.
Məsələ ilə bağlı politoloq Əhəd Məmmədli Crossmedia.az-la fikirlərini bölüşüb:
"Sülhün bu mərhələdə əldə olunması olduqca çətin məsələdir. Ümumiyyətlə, sülhün bərqərar olması üçün adətən tərəflərdən biri qələbə qazanmalıdır. Lakin Rusiya–Ukrayna müharibəsində hazırda heç bir tərəf qalib deyil. Rusiya müəyyən əraziləri işğal etsə də, tam hərbi üstünlüyə malik deyil. Müharibə əsasən sərhədboyu “pozisiya savaşı” formasında davam edir. Yəni bəzən bir tərəf bir kəndi ələ keçirir, bir neçə gün sonra digər tərəf həmin ərazini geri alır. Eyni zamanda, döyüşlərdə dronlardan geniş istifadə olunur, tərəflər bir-birinə qarşı texnoloji üstünlük nümayiş etdirməyə çalışırlar.
Bu səbəbdən, yaxın zamanda sülh müqaviləsinin imzalanması real görünmür. Lakin atəşkəs mümkündür. Əslində, hər bir müharibə mərhələsinin sonunda atəşkəs razılaşması əldə olunur. Hazırda həm Donald Tramp, həm də Vladimir Putin məhz bu istiqamətdə müəyyən cəhdlər göstərirlər. Tramp Ukrayna Prezidenti Volodimir Zelenskini də bu məsələdə razı salmağa çalışır".
Politoloq, həmçinin Putinin hazırkı vəziyyətinin mürəkkəb olduğunu qeyd edib:
"O, özünü elə bir duruma salıb ki, geri addım atmaqdan çəkinir. Çünki bu halda Rusiya cəmiyyətində onun siyasətinə dair ciddi suallar və narazılıqlar yarana bilər. Digər tərəfdən, Zelenski də ərazi iddialarından imtina etsə, bu, onun üçün siyasi baxımdan “ölüm hökmü” kimi qəbul oluna bilər. Trampın son açıqlamalarında bildirilir ki, hazırkı vəziyyətdə ən real variant “mövcud cəbhə xəttində” atəşkəsin elan edilməsidir. Yəni Rusiya hazırda nəzarət etdiyi — təxminən Donbas bölgəsinin 78 faizində — mövqelərini saxlasın, Ukrayna da öz mövqelərində qalsın və tərəflər atəşkəsə razılaşsın. Hazırkı şəraitdə bu, ən optimal və reallaşması mümkün variant hesab olunur".
Elmir Heydərli
21:39 21.10.2025
Oxunuş sayı: 4107
