Britaniya parlamentində Hindistanın Cammu və Kəşmir üzərində suverenliyi dəstəklənib
Böyük Britaniya parlamentinin mühafizəkar deputatı Bob Blekmen Hindistanın Cammu və Kəşmir üzərində suverenliyini və ərazi bütövlüyünü dəstəkləyən təşəbbüslə çıxış edib.
Crossmedia.az xəbər verir ki, bu barədə Hindistanın “NDTV” telekanalı məlumat yayıb.
Deputat ötən həftə İcmalar Palatasına parlamentin diqqətini konkret məsələyə yönəltmək məqsədi daşıyan erkən gün təşəbbüsü (Early Day Motion) təqdim edib. Sənəd oktyabrın 26-da qeyd olunan Cammu və Kəşmirin Hindistana birləşməsi günü ilə əlaqədardır. Təşəbbüsə müxtəlif siyasi partiyaları təmsil edən daha üç deputat da imza atıb.
Sənəddə Böyük Britaniyada yaşayan, Cammu və Kəşmirlə mənşə əlaqəsi olan insanların bu günü qeyd etməsi vurğulanır. Həmçinin 1947-ci il oktyabrın 26-da Cammu və Kəşmirin hakimi Maharaca Hari Sinqhin Hindistana birləşmə sənədini imzaladığı xatırladılır.
Təşəbbüsdə Hindistan Respublikasının Cammu və Kəşmir üzərində suverenliyi və ərazi bütövlüyü dəstəklənir, eyni zamanda Böyük Britaniya ilə Hindistan arasında möhkəm və konstruktiv ikitərəfli münasibətlərin əhəmiyyəti qeyd olunur.
Qeyd edək ki, 2019-cu ildə Cammu və Kəşmirin ştat statusu ləğv edilib və ərazi ittifaq ərazisi kimi yenidən təşkil olunub. Ladax isə ayrıca ittifaq ərazisinə çevrilib.
19:48 22.10.2026
Oxunuş sayı: 46
