Arıqlamaq üçün darçınlı su içənlərə xəbərdarlıq: Qaraciyərinizi korlamayın
Arıqlamaq və həzmi yaxşılaşdırmaq məqsədilə təbii vasitələrə maraq artdıqca darçınlı su da sosial şəbəkələrdə geniş müzakirə olunan içkilərdən birinə çevrilib. Darçının bəzi bioloji aktiv maddələri maddələr mübadiləsinə təsir göstərə bilsə də, mövcud elmi araşdırmalar onun arıqlamağa kömək etdiyini qəti şəkildə təsdiqləmir. ABŞ Milli Tamamlayıcı və İnteqrativ Sağlamlıq Mərkəzinin məlumatına görə, darçının çəki itkisinə təsiri ilə bağlı nəticələr hələ də qeyri-müəyyəndir. Digər tərəfdən, darçının xüsusilə yüksək miqdarda və uzun müddət qəbulu həzm problemlərinə, allergik reaksiyalara, bəzi növlərində olan kumarin maddəsi isə qaraciyər üçün riskə səbəb ola bilər. Bəs darçınlı su həqiqətən arıqlamağa kömək edirmi və onu gündəlik istehlak edərkən hansı məqamlara diqqət yetirmək lazımdır?
Qida eksperti Fərid Səfərov Crossmedia.az-a açıqlamasında darçınlı suyun arıqlamağa təsiri və mümkün riskləri barədə danışıb: “Darçının tərkibində antioksidant xüsusiyyətlərə malik bioloji aktiv maddələr var. Bəzi tədqiqatlarda darçın qəbulunun qan şəkərinin tənzimlənməsinə və maddələr mübadiləsinin bəzi göstəricilərinə müsbət təsiri müşahidə edilsə də, bu nəticələr darçınlı suyun birbaşa arıqlatdığını sübut etmir”.
Darçının maddələr mübadiləsinə və çəki itkisinə təsirini şərh edən ekspert bildirib: “Darçın maddələr mübadiləsini əhəmiyyətli dərəcədə sürətləndirən və bədəndəki piyləri əridən vasitə hesab olunmamalıdır. Arıqlama əsasən qəbul edilən və sərf olunan enerji arasındakı balansdan, qidalanma rejimindən və fiziki aktivlikdən asılıdır”.
Darçınlı suyun həzmə təsirinə toxunan Fərid Səfərov qeyd edib: “Şəkərsiz darçınlı su digər şəkərli içkiləri əvəz etdikdə dolayı yolla çəki nəzarətinə kömək edə bilər. Həzmə təsiri isə fərdi xüsusiyyətlərdən asılıdır. Darçınlı suyun köp və qəbizlik kimi problemləri müalicə etdiyinə dair kifayət qədər etibarlı sübut yoxdur”.
Ekspert darçının həddindən artıq istifadəsinin sağlamlıq üçün risk yarada biləcəyini də vurğulayıb: “Müntəzəm istehlak zamanı darçının növünə və miqdarına diqqət yetirmək vacibdir. Xüsusilə geniş istifadə olunan kassiya darçınında kumarin adlı maddə var. Bu maddənin yüksək miqdarda və uzun müddət qəbulu qaraciyərə zərər verə bilər. Həddindən artıq darçın qəbulu mədə-bağırsaq narahatlığına və allergik reaksiyalara da səbəb ola bilər”.
Fərid Səfərov bəzi şəxslərin darçınlı suyu müntəzəm qəbul etməzdən əvvəl həkimlə məsləhətləşməli olduğunu bildirib: “Qaraciyər xəstəliyi olanlar, eləcə də qan şəkərini aşağı salan və ya qan laxtalanmasına təsir edən dərmanlar qəbul edənlər darçınlı suyu müntəzəm istifadə etməzdən əvvəl həkimlə məsləhətləşməlidirlər”.
Ekspertin sözlərinə görə, sağlam çəkiyə nail olmaq üçün darçınlı suya deyil, düzgün qidalanmaya və fiziki aktivliyə üstünlük verilməlidir: “Darçınlı su möcüzəvi arıqlama vasitəsi deyil. Onu şəkər əlavə etmədən, ölçülü miqdarda içmək olar. Lakin arıqlamaq məqsədilə həddindən artıq konsentrasiyalı hazırlamaq və ya yüksək dozada istifadə etmək düzgün deyil. Sağlam çəkiyə nail olmaq üçün balanslı qidalanma, fiziki aktivlik və davamlı həyat tərzi dəyişiklikləri daha əsaslı və effektiv yanaşmadır”.
Nigar Xəlilli
20:30 22.10.2026
Oxunuş sayı: 57
