Ağciyər xəstəliklərinin müasir diaqnostikası və müalicə üsulları müzakirə olunub
Oktyabrın 4-də Səhiyyə Nazirliyi Elmi-Tədqiqat Ağciyər Xəstəlikləri İnstitutu tərəfindən təşkil edilən Ümumdünya Ağciyər Sağlamlığı Gününə həsr edilmiş beynəlxalq elmi-praktiki konfrans keçirilib. Konfransda ağciyər xəstəliklərinin müasir diaqnostikası, müalicə üsulları, elmi yeniliklər və beynəlxalq əməkdaşlığın inkişafı mövzuları müzakirə olunub.
Crossmedia.az xəbər verir ki, çıxışı zamanı ağciyərin insan orqanizmində həyati vacib orqan olduğunu deyən səhiyyə nazirinin müavini Nadir Zeynalovun sözlərinə görə, təmiz hava ilə nəfəs almaq, daha sağlam ağciyərlərlə yaşamaq uzun ömür sürməyə imkan verir. O, vətəndaşların ağciyər xəstəlikləri, onun səbəb və nəticələri ilə bağlı maarifləndirilməsi tədbirlərinin tibb işçilərinin üzərinə düşdüyünü qeyd edib: "Ekoloji amillər, tütünçəkmə kimi zərərli vərdişlər ağciyərlərin sağlamlığına təsir edir. Səhiyyə işçilərinin görə biləcəkləri işlərdən başqa, tibbi tədbirlər də var. Bunlardan biri ağciyər xəstəliklərinin erkən diaqnostikasıdır. Digər məsələ inhalyasyon dərmanların əlçatanlığıdır. Bir çox ağciyər xəstəliklərinin müalicəsində istifadə olunan həmin dərmanlar effektiv olsalar da, qiyməti çox bahadır. Onların əlçatanlığında müəyyən çətinliklər var. Ona görə də bu istiqamətdə işlər görməliyik".
Milli Məclisin deputatı, Səhiyyə komitəsinin üzvü Soltan Məmmədov çıxışı zamanı bu ilin ən vacib tədbirlərindən birinin Milli Məclisdə vərəmlə mübarizəyə həsr edilən dinləmənin keçirilməsi olacağanı vurğulayıb.
Deputatın sözlərinə görə, bu, bir daha göstərir ki, parlament səhiyyənin inkişafına davamlı olaraq dəstək göstərməyə hazırdır: "İstənilən sahədə əldə olunan uğurlar ölkəmizin Prezident İlham Əliyevin rəhbərliyi altında həm sosial, həm iqtisadi, həm də humanitar istiqamətdə inkişafının bariz nümunəsidir. Xüsusilə səhiyyəmizin inkişafında uğurlar göz qarşısındadır. Milli Məclis səviyyəsində də davamlı olaraq qanunvericilik bazasının təkmilləşdirilməsi, vərəmlə mübarizədə lazım olan tədbirlərin görülməsi üçün işlər aparılır. Müvafiq qurumların gördüyü işlərlə bərabər, Milli Məclis də tələb olunan bütün qanun dəyişikliklərini etməyə hazırdır".
Azərbaycanda ağciyər xəstəlikləri ilə mübarizə sahəsində inkişaf olduğunu deyən Milli Məclisin deputatı, Səhiyyə komitəsinin üzvü Pərvanə Vəliyeva bildirib ki, vərəmlə mübarizədə görüləcək işlərin yüksək səviyyəyə çatdırılması, xidmətin təkmilləşdirilməsi üçün layihələr həyata keçirilir. Qeyd olunub ki, həmin məqsədlə 32 kənd həkim məntəqəsinin istifadəyə verilməsi nəzərdə tutulur. Vərəmlə mübarizə tədbirlərinə innovasiyalar və yeniliklər daxil edilib: “Burada gizli aşkarlanma, erkən diaqnostika, güclü qanunvericilik, dayanıqlı idarəetmə və multisektoral yanaşma olmalıdır. Vərəmlə mübarizə aparmaq üçün normativ hüquqi aktlar güclü olmalı, qanunvericilik günün tələblərinə cavab verməlidir. Sosial xidmətlər vərəm xəstələri üçün əlçatan olmalı, tibb işçilərinin sosial təminatı gücləndirilməlidir. Sevindiricidir ki, vərəmlə mübarizədə nailiyyətlər əldə olunub. Ölkəmizdə MDB məkanında ilk və tək beynəlxalq statuslu Ümumdünya Səhiyyə Təşkilatı ilə əməkdaşlıq mərkəzi açılıb. Bu günə qədər ölkəmizin vərəmlə mübarizə təcrübəsini 23 ölkədən 200-dən çox mütəxəssis öyrənib”.
TƏBİB-in İcraçı direktorunun müavini Anar İsrafilov vərəmlə mübarizənin dünyada aktual problemlərdən biri olduğunu, Ümumdünya Səhiyyə Təşkilatının, bir çox təşkilat və dövlətlərin səylərinə baxmayaraq, gündəlik 4000-4500 xəstənin həmin xəstəlikdən həyatını itirdiyini, onlardan 600-700-nün uşaqlar olduğunu diqqətə çatdırıb: “Bu, problemin miqyasını göstərir, bizi daha əzmlə və mütəşəkkil çalışmağa sövq edir”.
Ölkəmizdə vərəmlə mübarizə tədbirlərindən bəhs edən A.İsrafilov müsbət nəticələrin də müşahidə edildiyini bildirib: "Sumqayıtda xəstələrin dərmanları birbaşa evlərinə çatdırılır və videokonfrans vasitəsilə qeydə alınır. Bu da yoluxmanın qarşısının alınması üçün çox önəmlidir. Müayinələrin yerlərdə profilaktik qurğularla aparılmasını planlayırıq. Xəstəliyin aradan qaldırılmasında mütəşəkkillik çox vacibdir".
İcbari Tibbi Sığorta üzrə Dövlət Agentliyinin İdarə Heyəti sədrinin müşaviri Nelli Veysova 2021-ci ildən ölkə ərazisində icbari tibbi sığortanın tətbiq edildiyini və bu gün də prosesin uğurla davam etdiyini bildirib: "Bu gün xidmətlər zərfində 3315-dən artıq xidmət mövcuddur ki, onlar arasında ağciyər xəstəliklərinin müayinəsi, müalicəsi və profilaktikasına aid xidmətlər də yer alıb".
Tədbir təqdimatlar və mövzular ətrafında müzakirələrlə davam edib.
17:10 04.10.2025
Oxunuş sayı: 7968
