"Tesaa World": İlham Əliyev Yaxın Şərqin mürəkkəb geosiyasi mənzərəsində açar oyunçuya çevrilir
Dubayın Tesaa World saytında Yaxın Şərqdə Azərbaycanın vasitəçilik roluna həsr olunmuş məqalə dərc olunub.
Crossmedia.az xəbər verir ki, məqalədə aşağıdakı məqamlar vurğulanır:
“Azərbaycan İsrail və Suriya arasında vasitəçilik etdiyini açıqlayıb, Dəməşqlə strateji enerji sazişlərini ictimaiyyətə təqdim edib. Bu addım ölkənin bölgədəki rolunun möhkəmləndirilməsi baxımından mühüm mərhələ hesab olunur. Prezident İlham Əliyev, Azərbaycanın Yaxın Şərqin mürəkkəb geosiyasi mənzərəsində açar oyunçuya çevrilməsi istiqamətində qətiyyət nümayiş etdirir.”
Əliyev (“Əl-Ərəbiyyə” telekanalına müsahibəsində) təsdiqləyib ki, Bakıda İsrail və Suriya rəsmiləri arasında danışıqlar baş tutub. Bu, 2024-cü ilin sonlarında Əsəd rejiminin devrilməsindən sonra bu formatda baş tutan ilk görüş olub. Danışıqlar fonda davam edən sərhəd toqquşmaları və İsrail ordusunun avqustda dörd dəfə Əl-Kuneytra vilayətinə daxil olması şəraitində baş verib.
Əliyev həmçinin Azərbaycan–Türkiyə–Suriya–Qətər arasında dördtərəfli qaz tədarükü sazişinin bağlandığını bəyan edib. Birinci mərhələ avqust ayında başlayıb – gündə 3,4 milyon kubmetr qaz ixrac olunur. Bu saziş Suriya iqtisadiyyatı üçün xilas halqası sayılır və enerji sahəsində genişmiqyaslı regional əməkdaşlığa qapı açır. Qətərin maliyyə dəstəyi ilə Azərbaycan qazı Suriyanın elektrik stansiyalarına yönəldiləcək, bu da illərdir enerji böhranından əziyyət çəkən suriyalılara yardım ola bilər.
Əliyev həmçinin Azərbaycanın Türkiyə və İsrail arasında vasitəçi kimi çıxış etməyə hazır olduğunu bildirib. Qeyd olunub ki, keçmişdə Bakı bu ölkələr arasında normallaşma prosesinə uğurla töhfə verib. Bununla belə, Ankara və Təl-Əviv arasında dərin fikir ayrılıqları bu təşəbbüsün çətin diplomatik vəzifə olduğunu göstərir.
Eyni zamanda Əliyev ABŞ prezidenti Donald Trampın Nobel Sülh Mükafatına layiq görülməsi ideyasını dəstəkləyib və onu “sülh istəyən lider” kimi xarakterizə edib. Bu mövqe, bir sıra regional məsələlərdə Bakı ilə Vaşinqton arasında qeyri-rəsmi ittifaqı əks etdirir.
Məqalədə qeyd olunur ki, Azərbaycanın vasitəçilik fəaliyyəti yeni bir regional diplomatiya modeli təqdim edir — burada kiçik ölkələr sülh prosesində açar iştirakçılara çevrilirlər. Lakin bu modelin uğuru ənənəvi alyansları aşmaq və bütün tərəflərin maraqlarına cavab verən yeni mexanizmlər yaratmaq bacarığından asılı olacaq.
13:39 29.08.2025
Oxunuş sayı: 903
